Ni MARLON A. RODRIGO
CLAVERIA, CAGAYAN. Oktubre 11, alas siete iti bigat. Iti laksid ti kinarungsot dagiti dalluyon a gapuanan ni Bagyo Maring, inkeddeng dagiti dua a security guard ti Claveria International Port, da Pedro Sanghilan ken Freddie Gusi, a penken no awan met laeng ti dadael ti causeway a bambantayanda. Bayat ti panangtaluntonda iti causeway, dida napakadaan ti irurugma ti nangato ken narungsot a dalluyon a nangakup ken nangitinnag iti baybay ken ni Sanghilan. Dagus a nangipuruak ni SG Gusi iti tali ken ni Sanghilan ngem inalun-onen dagiti dalluyon ti naud-udi.
Immawag ni SG Gusi iti saranay. Dagus met a naggaraw dagiti kameng ti Claveria Police Station, 202nd Maritime Police Station Claveria, Coast Guard Claveria ken ti Rescue 41 Claveria. Ginubalda ti rungsot dagiti dalluyon ken sinarakusokda ti bumanegbeg a tudo. Nabirokanda ni SG Sanghilan; intarayda iti Claveria Rural Health Unit ngem naideklarar a dead on arrival daytoy, kas kinuna ni Dr. Milrose Tangonan, Municipal Health Officer.
Agtawen laeng iti 27 ni SG Pedro Sanghilan, tubo ti Centro 3, Claveria, Cagayan. Baro pay. Ur-urayenna laengen ti panagsapatana a kas kameng ti Philippine Coast Guard. Maysa a nasingpet ken addaan arapaap a Claveriano. Isuna ti naideklarar nga immuna a napasag iti Amianan a Luzon gapu iti kinaulpit ni Bagyo Maring.
