Ni LIEZLE BASA IÑIGO
Iti tiempo ti panagkasapulan iti tulong, mapangnamnamaan met ti social media.
Babaen ti panangipaskilda iti delikado a kasasaadda iti social media, walo nga indibidual a nakubong gapu iti layus bayat ti kapigsaan ti bagyo “Maring” ti naisalakan dagiti militar iti Brgy. Kabugbugan, Luna, La Union idi Martes, Oktubre 12.
Nairusat ti tulong idi nakita ni Jhai Galenzoga ti Office of the President ti pakaasi iti social media. Dagus a nangipatulod iti report dagiti tao ti Malakanyang iti Northern Luzon Command.
Segun iti paskil, naipakpakaasi ti pannakaipatulod dagiti kameng ti Army a tumulong iti Luna, La Union ta addan dagiti malmes ken saan a kabaelan dagiti kameng ti polisia ta bassit laeng ti bilangda.
TURISMO: Intayon Idiay Ayuyang Garden iti Pila, Siudad ti Laoag!
Apaman a dimteng ti pakaammo, dagus a nagtignay ti Disaster Response Team ti La Union iti babaen ti JTF Karagatan a napan iti lugar ken nagballigi dagitoy a nangisalakan kadagiti nakubong nga indibidual.
Naipan dagitoy iti nataltalged a lugar banag a nakaragsakan dagiti kakabagian dagitoy.
Kabayatanna, iti pannakaisursurat daytoy, madama pay laeng ti itutulong dagiti kameng ti JTF Tala ken JTF Kaugnay iti maiwaywayat a panagbakuit, panangwada kadagiti kalsada, ken panangidanon kadagiti tulong a taraon kadagiti lugar a dinidigra ti napalabas a bagyo.
(Damag manipud iti Manila Bulletin.)
