Ni ROSELYN C. CAMPANO
Awanen ni Bagyo Maring ngem nabatad dagiti imbatina a napait a pakalaglagipan kada agassawa a Myla ken Rommel Pascual ti Brgy. Smart, Gonzaga, Cagayan.
Iti isasangbay ti nasao a bagyo idi Lunes, Oktubre 11, saanda a ninamnama ti napartak a panagdinakkel ti danum. Addada iti mismo a sakaanan ti aw-awaganda iti “Spillway” nga igid a mismo ti waig ken nababbaba ngem ti kalsada, awanen ti naaramidanda no di yalikaka ti biagda idi dumakkelen ti danum.
Kas kuna ni Myla, naruamdan iti layus ngem saanda a namnamaen a kasdiay ti kinapartak ti panagngato ti danum.
Kabigatanna, idi sublianda ti pagtaenganda, awanen daytoy. Nayanud ti sibubukel a balayda agraman dagiti naipundarda nga alikamen.
TURISMO: Intayon Idiay Ayuyang Garden iti Pila, Siudad ti Laoag!
Iti salaysay ni Rommel, nabiit pay a nakadanonda idi iti evacuation center idi nabuyada manipud iti FB Live ti kaarrubada ti pannakayanud ti balayda. Napidutna ketdi umbaas ti layus dagiti dadduma a tukkol a tarikayo ti balayda agraman badbadoda.
Maladingitanda unay ta uray ti bagas a nateggedanda, nabasa ket saan a kayat a kanen ti uray pato wenno kalding.
Iti agdama, addada pay laeng iti evacuation center ti Gonzaga bayat nga agur-urayda iti tulong tapno makapatakderda manen iti balayda. Kangrunaan a kasapulanda ita ti lupot ken makan.
Malaksid kadakuada, adda pay maysa a nayanud met laeng ti balayda a karrubada. Ngem isuda amin nga agnanaed iti spillway, natinep dagiti balayda.
