Ni CHITO CHAVEZ
Inrusat ti Department of the Interior and Local Government (DILG) ti agresibo nga information drive nga agpanggep a mangallukoy iti panagpabakuna dagiti agduadua maipapan iti bakuna kontra iti coronavirus disease (COVID-19).
Naawagan iti Dagyaw 2021 Open Government Town Hall Meeting, kuna ni DILG Secretary Eduardo Año nga itandudo daytoy ti programa iti bakuna tapno matun-oyan ti pannakasalaknib dgiti umili.
Maysa a serye ti tungtongan daytoy Dagyaw nga agpanggep a mangilawlawag kadagiti programa ti turay a mangapektar kadagiti lokal a komunidad ken mangipaay iti gundaway kadagiti gagangay nga umili a mangipeksa kadagiti pakaseknanda kadagiti nangato ti takemna nga opisial ti gobierno.
Inladawan ni Año ti Dagyaw a kas gundaway para iti turay nga umasideg kadagiti umili ken agbalin a dap-ayan (lugar a pagtutungtongan) para iti turay ken umili tapno mapagpatangan dagiti napapateg nga isyu iti kagimongan, nga iti daytoy a gundaway, dagiti kaudian a gannuat ti gobierno para iti pannakabakuna dagiti umili kontra iti COVID-19.
Manipud Kadagiti Agdama a Kameng ti Bannawag: Dios ti Agngina!
Innayon daytoy a ti Dagyaw 2021, oportunidad para iti gobierno a mangiturong iti imatangna kadagiti tattao a mismo babaen ti pannakiuman kadagitoy maipapan kadagiti isyu a mainaig iti agraraira a pandemia ken no kasano a risuten daytoy ti gobierno.
Kuna ni Año a masapul a maipalagip a kanayon kadagiti tattao nga agtrabtrabaho latta ti gobierno iti laksid ti pannakakumikomen ti kaaduan iti umay nga eleksion.
Nayalnag ti Dagyaw 2021 itay Biernes, Oktubre 15, babaen ti zoom tele-conferencing platform ken nai-live-stream iti DILG Philippines Facebook page.
Mabalin a makadar-ay ti publiko iti Dagyaw 2021 babaen ti panangbisita iti official Facebook page ti Philippine Open Government Partnership kasta met a maammuan dagiti detalye ken pakaammo babaen ti panangbisita kadagiti social media account ti DILG, Department of Budget and Management (DBM), ken Presidential Communications Operations Office (PCOO).
Ginutigot met ni Año dagiti amin a provincial local governments iti sibubukel a pagilian a mangiwayatda iti bukodda a bersion ti Dagyaw kadagiti bukodda a masakupan tapno marangtayan ti nagbabaetan dagiti opisial ti gobierno ken ti publiko tapno mapasayaat pay ti pannakaidanon ti serbisio publiko.
Babaen ti DILG Memorandum Circular 2021-106 a naipaulog itay napan a bulan, impalagip ni Año kadagiti gobierno probinsial a mangiwayatda iti maysa a Dagyaw town hall meeting manipud iti Oktubre agingga iti arinunos ti tawen.
