Rugian manen ti GUMIL Filipinas, ti gunglo dagiti mannurat nga Ilokano iti Filipinas ken iti ballasiw-taaw, nga ummongen ti pakasaritaan dagiti mannurat nga Ilokano nga immuna a napasamak iti pannakaipablaak ti GUMIL Filipinas Directory of Ilocano Writers idi 1992. Agduapulon a tawen ti napalabas ket adu pay ti mainayon iti listaan a nagsurat wenno naglatak iti panagsurat kalpasanna dayta.
Segun ken ni Neyo E. Valdez, Sekretario-Heneral ti GUMIL Filipinas ken agpapaay a Secretariat iti proyekto, mayalnag ti Directory inton 2023 a kas paset ti selebrasion ti maika-55 nga anibersario ti GUMIL Filipinas. Agserbi ti directory a reperensia dagiti agsukisok kadagiti mannurat nga Ilokano ken kadagiti gapuananda, iti ania a man panawen ken iti ania man a klase ti sinurat.
Naisagana metten ti pagalagadan iti panangpili kadagiti mannurat a mairaman iti directory, babaen ti napagnunumuan dagiti kameng ti Technical Working Group iti immuna a virtual meeting ti grupo idi Septiembre 11.
Dagiti pagalagadan iti panangpili kadagiti mannurat a para iti directory:
- Adda gapuananna a sarita, daniw, nobela, salaysay, drama ken/wenno dagiti scholarly articles a kas koma iti mainaig iti literatura, lengguahe, pakasaritaan ken kultura, ken/wenno adda naipatarusna a gapuanan (translation).
- Naisurat dagitoy iti Ilokano, Ingles, Filipino (Tagalog) wenno dadduma pay a lengguahe.
- Sibibiag man wenno natayen, wenno amin a mannurat manipud idi panawen ni Pedro Bucaneg.
- Uray sadino ti nakayanakanna basta Ilokano wenno adda puonna nga Ilokano.
- Nailibro man dagitoy wenno naipablaak kadagiti magasin, pagiwarnak wenno journal. Rumbeng a ti magasin wenno pagiwarnak ket addaan iti general nationwide circulation.
- Kadagiti awan naisuratna a libro, rumbeng a nakaipablaaken kadagiti magasin wenno pagiwarnak iti ania man kadagitoy: tallo a sarita, tallo a salaysay (nonfiction), wenno tallo a daniw.
Mailanad iti bionote ti ababa a pakasaritaan iti biag, kompleto a listaan dagiti gapuanan, dagiti naawat a pammadayaw, ken dadduma pay a mainaig iti pannakaam-ammo ti mannurat iti tay-ak ti panagsuratan. Mairaman a maipatulod ti kaudian a high-resolution a ladawan.
Segun ken ni Remy N. Albano, GF President, dakkel a proyekto daytoy a makatulong kadagiti agsuksukisok iti kurditantayo nga Ilokano wenno kadagiti Ilokano a naglatak babaen ti kontribusionda iti literatura. Innayonna a masapul a mairaman amin a mannurat; nga awan ti malibtawan.
Kiniddaw ni Albano a tumulong dagiti provincial chapter ti GUMIL a mangaramid ken mangidatag dagiti bionote dagiti kamengda wenno kaprobinsiaanda nga awanan iti koneksionna iti internet, saan a napakaammuan iti awis, wenno natayen, ken tumulong met ti asino man a kameng a mangaramid ken mangidatag dagiti bionote dagiti am-ammoda, kakabagian wenno gagayyemda a mannurat nga Ilokano, no kasapulan.
Maipatulod dagiti bionote, a naisurat iti Ingles, iti email babaen ti [email protected] iti di naladaw ngem Enero 17, 2022.
