SIUDAD TI ILAGAN, Isabela. Inyalat ti aglinawas a pagiwarnak a Luzonwide News Correspondent ti “Best in Reporting Migration Issues” iti kallabes a PPI 2020 Civic Journalism Community Press Awards nga intuyang ti Philippine Press Institute, asosiasion dagiti aginaldaw ken aglinawas a pagiwarnak iti pagilian babaen ti virtual awarding idi Oktubre 8.
Kinuna ni Ariel Sebellino, PPI executive director, a baro a kategoria ti Best in Reporting on Migration Issues a sinuportaran ti International Labor Organization, Nickel Asia Corporation, kdp. iti tinawen a panangpili kadagiti kangrunaan a community newspapers iti pagilian.
Dagiti naipablaak idi tawen 2020 ti kinutuan dagiti kameng ti hurado manipud iti Philippine DailyInquirer, Asian Institute of Journalism Center, Philippine Network of Environmental Reporting, Vera Files, Philippine Center for Investigative Journalism, kdp.
Malaksid iti aglinawas a Luzonwide News Correspondent a naisurat iti Ingles, nakastrek iti final stage ti Southern Leyte Times News a kas maysa a nominado ngem inatiw ti umuna.
Masarakan ti online news website ti pagiwarnak iti www.luzonwidenewscorrespondent.net ken addaan iti Facebook page, Luzonwide News Correspondent.
Naisangsangayan dagiti damag ken impormasion ti pagiwarnak, kas dinakamat dagiti kameng ti hurado nangruna iti maipanggep kadagiti agtrabtrabaho iti ballasiw-taaw a nakaimalditan ti saning-i dagiti Filipino idi limned ti maysa a barko iti Japan ken dadduma pay a pakaseknan dagiti migrante a Filipino. Malaksid itoy, kuna dagiti hurado nga addaan ti pagiwarnak iti regular a kolum a makatulong iti legal a wagas ken impormasion para kadagiti marino wenno seafarers.
Inlungalong ni Villamor Visaya Jr., mannurat ti Bannawag, ti nadakamat a pagiwarnak idi Hunio 2011 ken katinnulongna a mangimaton iti panangimaldit ken panagiwarnak ni Rosenda Visaya, kapisi ti pusona, ken ti inauna nga ubingda, ni Vince Jacob Visaya a kas editor.
Addaan ti Correspondent kadagiti kolum dagiti agkakalatak a mannurat nga Ilokano, a kaaduanna ti mannurat ti Bannawag, a kas kada Reynaldo Andres, Ferdinand Cortez, Rudy Contillo, Atty. Dennis Gorecho, Henrylito Tacio, Estanislao Albano Jr., Bernie Lopez, Troy Miano, kdp.

Malaksid iti Correspondent, ipabpablaak pay ni Visaya ti Balitang Hilaga, aglinawas a pagiwarnak iti Filipino a nailungalong idi Pebrero 2019. Ti website ti pagiwarnak: www.balitanghilaga.net. Addaan met iti Facebook page.
Nangabak met iti aginaldaw nga edision iti nasao a kategoria ti The Daily Guardian.
Dagiti dadduma pay a nangabak: Best in Photojournalism-- Freeman (Daily), Metro Post (Weekly); Best in Environmental Reporting-- Leyte-Samar Daily Express (Daily), Baguio Chronicle (Weekly); Best in Business Reporting--Sunstar Cebu (Daily), Baguio Herald Express (Weekly); Best Editorial Page--Sunstar Pampanga (Daily), Palawan News (Weekly); ken Best in Editorial Page--Sunstar Cebu (Daily), Metro Post (Weekly).
Katinnulong ti PPI ti Nickel Asia, SM Investments, Ayala Corporation, San Miguel Corporation ken McDonald's iti tinawen a pasken.