Ni CLES B. RAMBAUD
Ipablaak ti Komisyon sa Wikang Filipino (KWF) ti “Tarabay iti Ortograpia ti Pagsasao nga Ilokano” iti kabiitan a panawen, kas pangipaneknek ti KWF nga awan ti sabali a bigbigenna nga ortograpia ti Ilokano no di ti nailanad wenno isursuro ti nasao a pagbasaan.
Daytoy ti kinuna ni Dr. Benjamin M. Mendillo, Jr., Full-time Commissioner ti KWF ken mangibagi iti lengguahe nga Ilokano iti Komision, iti birtual a pannakiuman ti Bannawag ken ti GUMIL Filipinas kenkuana itoy nga Oktubre 18, Lunes.
Innayon ni Komisioner Mendillo nga agpaay pay daytoy a sungbat ti KWF iti panagduadua dagiti mannursuro no ania ti rumbeng nga aramatenda nga ortograpia ti Ilokano, nangruna iti panagaramidda kadagiti modiul.
Kinunana nga awan ti bigbigen ti agdama a liderato ti KWF nga ortograpia ti lengguahe nga Ilokano no di ti naipalaon iti “Tarabay” ta dagiti nadakamat ditoy a pagalagadan iti ortograpia, naibatay kadagiti adu a sinurat dagiti Ilokano, kas ipakita dagiti nobela, sarita, daniw ken salaysayda iti Bannawag ken kadagiti adun a libro ti GUMIL Filipinas.
Nairuar ti “Tarabay” idi 2012 idi panawen ni KWF Chairman Jose Laderas Santos ngem naipaigid daytoy idi panawen ni KWF Chairman Virgilio S. Almario. Nangiruar ti liderato ni Almario iti baro nga ortograpia ti Ilokano banag a nakaulawan ti adu a mannursuro ta nagbalinen a dua nga agsupadi nga ortograpia ti Ilokano ti maar-aramat kadagiti pagadalan.
Kas maysa kadagiti addang iti pannakapapigsa ti “Tarabay,” kinuna ni Komisioner Mendillo a kinasaritanan dagiti amin a direktor ti Sentro ng Wika at Kultura a nakabase kadagiti kangrunaan a kolehio ken unibersidad iti Amianan a Luzon nga awan koma ti sabali nga ortograpia ti Ilokano a suportaranda no di ti nailanad iti “Tarabay.”
Sakbayna, iti panagpaay ni Komisioner Mendillo a naisangayan a sangaili ken agsarita iti kallabes a Dap-ayan 2021 ti GUMIL Filipinas, imbatadna a ti agdama a liderato ti KFW, “raemenna ti dignidad ti tunggal lengguahe.”
“Agsipud ta bigbigen ti KWF a ti tunggal lengguahe ket agsantak iti bukodna a lubong, ti karit para iti KWF ket isu ti panangpadur-asna iti lengguahe bayat met ti panangraemna iti dignidad ti tunggal lengguahe a kas identidad ti kultura nga ibagianna,” kinuna ‘toy patneng nga Ilokano a tubo ti Gen. M. Natividad, Nueva Ecija iti panagsaritana iti nasao a kallabes a birtual a kombension ti gunglo dagiti mannurat nga Ilokano iti Filipinas ken iti ballasiw-taaw.
Malaksid iti “Tarabay,” manamnama pay nga iruar ti KWF iti kabiitan a panawen ti katulongan a pagbasaan ti “Tarabay”-- ti “Ortograpia ti Ilokano: Pannakailawlawag Dagiti Pagalagadan ti Ortograpia ti Ilokano Para iti Nasamay a Pannakaisuro Daytoy Kadagiti Pagadalan.”
No sumagmamano laeng a kopia ti impablaak ti KWF a “Tarabay” idi 2012 a nakaigapuan ti panagpaimprenta ti GUMIL Filipinas iti nakurang a 5,000 a kopia a naibunong kangrunaanna kadagiti mannursuro, manamnama nga agpaimprenta ita ti baro a liderato ti KWF iti adu a kopia nga umdas a maibunong kadagiti mannursuro iti babaen ti kurikulum nga MTB-MLE.
