Ni DINDO DANAO
Lima a tattao ti kinemmeg ti La Union police gapu iti maatap nga illegal a panag-quarry dagitoy iti Tubao-Aringay River iti ili ti Tubao a maikontra kadagiti nailian a paglintegan ken kadagiti ordinansa ti probinsia.
Iti rekord ti polisia, idi alas 10:30 iti rabii ti Oktubre 19, tiniliw dagiti kameng ti 2nd La Union Provincial Mobile Force Company ken Tubao Police Station, iti pannakikoordinar ti Department of Environment and Natural Resources, Provincial Environment and Natural Resources Office (PENRO) ti La Union, ken Mines and GeoSciences Bureau (MGB), dagiti lima nga indibidual kalpasan ti pannakaawatda iti report ti kaadda ti illegal a panag-quarry iti Tubao-Aringay River iti Barangay Halog West, Tubao, La Union.
Natiliw ti investigating team iti akto nga agal-ala iti darat ken bato dagiti lima nga indibidual babaen ti panagaramatda kadagiti heavy equipment ken pagibiahe a trak. Mapapati a tao ida ti maysa nga adda impluensiana a tao itoy nga ili. “Awan met maipakitada a dokumento a mangipaneknek a legal ti ar-aramidenda a panag-quarry,” kas kuna ti polisia.
Dagiti naaresto: Lito O. Panelo, 40, residente ti Barangay Francia West, Tubao a kuna ti polisia nga operator ti LiuGong Payloader; Sammy L. Fernandez, 50, residente ti Barangay Magsaysay, Tubao ken operator ti Hyundai Excavator Backhoe; Irzo M. Asuncion, 50, residente ti Barangay Kagawad ti Halog West, Tubao ken drayber ti Sinotruck Dump Truck; Rolly S. Laron, 37, residente ti Barangay Francia West, Tubao ken drayber ti Isuzu Mini Dump Truck; ken Michael O. de Guzman, 39, residente ti Barangay Francia West, Tubao ken helper iti Isuzu Mini Dump Truck.
Manipud Kadagiti Agdama a Kameng ti Bannawag: Dios ti Agngina!
Nadetiner dagiti nainaganan a tattao iti Tubao Police Station ngem nakapagpiansada iti isu met laeng nga aldaw.
Dagus met a naipasardeng ti maatap nga illegal a panag-quarry iti nasao a lugar.
