Iti maika-7 a pasalip ti Saniata Prize, inyalat ni Rene Boy E. Abiva ti Umuna a Gunggona iti Salip iti Daniw idinto a ni Prodie Gar. Padios ti nangyalat iti Umuna a Gunggona iti Salip iti Ababa a Sarita.
Agnaed iti Cabanatuan, Nueva Ecija ken autor ti sumagmamano a libro iti Filipino, pinangyalat ni Abiva ti koleksion dagiti daniwna a “Depu, Lima nga Orasion ti Batbat Kontra Batibat ti Kagimongan.” Umawat daytoy iti PhP2,500.00 ken Sertipiko.
Inyalat met ni Johmar R. Alvarez ti Maika-2 a Gunggona babaen ti koleksion dagiti daniwna a “Ti Maudi a SONA Dagiti Kari Ken Ti Maudi A Kananakem ti Ili.” Umawat daytoy iti PhP2,000.00 ken Sertipiko.
Ni Prodie Gar. Padios met ti nangyalat iti Maika-3 a Gunggona babaen ti koleksion dagiti daniwna a “Timpuak Ti Bantay Ket Rinaut Ken Intabonna Ti Kapanagan... ken Dadduma Pay a Dandaniw ti Giteb-Ritmo ti Nakaparsuaan.” Umawat daytoy iti PhP1,500.00 ken Sertipiko.
Manipud Kadagiti Agdama a Kameng ti Bannawag: Dios ti Agngina!
Iti biang ti Salip iti Ababa a Sarita, pinangyalat ni Padios ti ababa a saritana a “Kigaw.” Maipaay ken ni Padios, dati nga editor iti Literatura iti Bannawag iti PhP2,500.00 ken Sertipiko.
Inyalat met ni Marlon A. Rodrigo ti Maikadua a Gunggona babaen ti ababa a saritana a “Sanaltek.” Umawat daytoy iti PhP2,000.00 ken Sertipiko.
Ni Johmar R. Alvarez met ti nangyalat iti Maika-3 a Gunggona babaen ti ababa a saritana a “Sardinas.” Umawat daytoy iti PhP1,500.00 ken Sertipiko.
Maipakaammo no kaano ti online a pannakayawat ti premio a maigiddan iti pannakayalnag dagiti libro nga inruar ti Saniata Publications iti daytoy a tawen.
Da Joel B. Manuel (pangulo), Roy V. Aragon ken Ariel Sotelo Tabag ti naghurado iti Salip iti Daniw idinto a da Cles B. Rambaud (pangulo), Juan Al. Asuncion ken Tabag ti naghurado iti Salip iti Ababa a Sarita.
Iti maika-8 nga edision ti pasalip a maawaganen iti Saniata Literary Awards, maluktan met laeng dagitoy dua a kategoria, salip iti daniw ken salip iti ababa a sarita.
