Ni CLES B. RAMBAUD

Linuktan ni Honor Blanco Cabie, mannurat ti Bannawag ken agdama a night editor ti Manila Standard, ti workshop-seminar nga inisponsoran ti The Bedan, pagiwarnak dagiti agad-adal iti San Beda University iti Manila, itay Oktubre 20.

Trinatar ni Cabie iti panglukat a diskurso kadagiti agad-adal ti tema ti seminar, babaen ti Zoom, “Mulat (Panagriing), Responsableng Journalismo sa Nagdaang mga Taon,” Imbuksilanna ti kayat a sawen ti tema kadagiti nagatendar.

Naigiddato ti workshop-seminar iti maika-80 nga anibersario ti The Bedan, nagpaayan ni Cabie a managing editor idi agbasbasa pay ken faculty adviser ken moderator idi nangisuro iti College of Arts and Sciences a nakadutokanna pay a coach ti CAS Debate Team.

Inatendaran daytoy dua nga aldaw a seminar ti dandani 100 nga agad-adal iti San Beda, University of Santo Tomas, Far Eastern University, Bulacan State University, Batangas State University, ken Del Pilar Academy.

Iti maikadua nga aldaw, Oktubre 21, naglektiur pay ni Cabie, dati a news editor ti National Broadcasting Network ken senior correspondent ti Reuters News Agency, no ania ti editorial ken kasano ti agsurat iti daytoy – nangipaayanna kadagiti padasna a nagsursurat iti editorial iti Manila Standard, Manila Times, PAENCOR Group of Publications, Pinaglabanan, ken TRIP.

Kadua ni Cabie a naglektiur dagitoy dadduma pay a beterano nga agiwarwarnak: Erel Cabatbat (news writing); Raul Dancel (feature writing); Victor Icasiano (sports writing) ken Jimmy Domingo (photo journalism).

Naangay ti immuna a Mulat idi 2019, babaen ti tema a “Tungo sa Makatotohanang Pagpapahayag” a nagbitlaan ni Sen. Risa Hontiveros; naulit ti Mulat itay napan a tawen iti tema “Tungkuling Journalismo sa Pampublikong Kaalaman” a nagsaritaan ni Joel Pablo Salud, dati nga editor ti Graphic magazine.