Ni ELLALYN DE VERA-RUIZ
Linuktanen ti University of the Philippines (UP) itay Lunes, Oktubre 25, ti panagawat kadagiti aplikasion para kadagiti estudiante iti umuna a tawen iti kolehio iti academic year (AY) 2022-2023.
Babaen ti paskil iti Facebook, nailanad a nakalukaten ti University of the Philippines College Application 2022 (UPCA2022).
Maibalakad kadagiti aplikante a bisitaenda ti upcollegeadmissions.up.edu.ph tapno mastrekda ti application portal.
Impalagip pay ti UP kadagiti aplikante a basaenda ti general information bulletin sakbay nga ipila dagitoy ti aplikasionda.
TURISMO: Intayon Idiay Ayuyang Garden iti Pila, Siudad ti Laoag!
Agpatingga ti panagawat kadagiti amin a dokumento iti panagaplay inton Nobiembre 30, 2021.
Dinakamat ti UP iti website daytoy nga iti laksid ti isasayaat ti kasasaad ti salun-at iti pagilian mainaig iti COVID-19, awan pay ti pinal a desision no maiwayat ti admission test para kadagiti sumrek iti 2022-2023.
Innayon daytoy a dagiti maala iti admission test ken grado iti hayskul ti kangrunaan a makaigapu iti pannakagun-od iti UP admission grade (UPG).
Segun iti UP, iti kaawan ti college admission test, ti pakabuklan dagiti pinal a grado kadagiti Grado 8, 9, 10, ken 11 ti pagbatayan iti panangdeterminar iti UPG.
Kasta met nga adda dagiti espesipiko a degree programs a pakasapulan kadagiti nayon a rekisito tapno maawat nga agbasa iti nasao nga unibersidad.
Tapno maisayangkat ti pagalagadan iti demokratiko a panagawat kadagiti agadal iti UP, dinakamat ti UP a maikonsiderar ti kasasaad iti biag ken disso a yan ti aplikante iti proseso ti panagawat.
(Damag manipud iti Manila Bulletin.)
