SIUDAD TI ALAMINOS, Pangasinan — Mangnamnama ti City Tourism Office daytoy a siudad iti yaadu dagiti agsangpet a turista kalpasan nga impakaammo ti turay ti probinsia a naibaba iti modified general community quarantine (MGCQ) ti agpang ti community quarantine ti probinsia manipud itay Lunes, Nobiembre 1, 2021.
Iti innuman idi Biernes, Oktubre 29, kinuna ni City Tourism Officer Miguel Sison a mapan a 100 agingga iti 200 a bisita ti napan nagpasiar iti nalatak a Hundred Islands National Park (HINP) kadagiti maikatlo ken maikapat a lawas ti Oktubre.
Kinuna ni Sison a kaaduan a lokal a turista ti nagpasiar gapu ta adda pay laeng ti probinsia iti general community quarantine with heightened restrictions manipud iti Septiembre 8 agingga iti Oktubre 30 a nakaipagelan dagiti turista manipud kadagiti lugar nga adda iti enhanced community quarantine ken modified enhanced community quarantine.
Idi Oktubre 29 met laeng nga impakaammo ti Inter-Agency Task Force for the Management of Emerging Infectious Diseases (IATF-EID) a maisubli ti Pangasinan iti MGCQ manipud iti Nobiembre 1.
TURISMO: Intayon Idiay Ayuyang Garden iti Pila, Siudad ti Laoag!
Kinuna ni Sison a babaen daytoy a kasasaad, mapalubosan nga agbiahe dagiti turista manipud kadagiti sabsabali a probinsia uray dagiti adda iti naig-iget a quarantine classification no la ketdi agtungpal dagitoy kadagiti rekisito.
Impakaammo ni Sison nga amin a turista manipud iti ruar ti Pangasinan, masapul nga agparehistro iti tarana.ph ken S-pass (Safe, Swift, and Secure passage) travel management system. Para kadagiti aggapu kadagiti lugar nga adda iti Alert Level 3 (kas iti Metro Manila), madawat ti negatibo a resulta ti reverse transcription-polymerase chain reaction (RT-PCR) test wenno rapid antigen test a naala 72 oras sakbay ti panagbiahe a kas rekisito wenno ti vaccination card a kas sukat ti RT-PCR test.
Iti biang dagiti residente ti Pangasinan, mangiparang laeng dagitoy iti balido nga identification card (ID) wenno pammaneknek a residenteda iti nasao a probinsia.
Innayon ni Sison a mapalubosan ti panangpalabas iti rabii kadagiti guest house iti HINP ita ta naibabawin ti “No Movement Day” iti tunggal Domingo iti nasao a siudad.
Addaan pay laeng ti isla iti uppat a nakasagana a guest house a pagtarusan: tallo ti adda iti Quezon Island ken maysa ti adda iti Mayor’s Island. Kinuna ni Sison a matartarimaan pay laeng dagiti dadduma.
Mairaman kadagiti kabaruan nga atraksion iti HINP ti view deck nga adda iti Ramos Island a pakabuyaan iti sibubukel a buya ti nasao a tourist spot.
Kinuna ni Sison a nabakunaan metten amin nga empleado iti HINP ken iti opisina ti turismo saan laeng a para iti proteksion dagitoy no di pay ket para kadagiti turista.
(Damag manipud iti Philippine News Agency ken Manila Bulletin.)
