Salaysay ni VILLAMOR VISAYA, JR.
SIPUD pay idi ubing, managbasan ni Manong Carlos Madriaga Cabang iti Bannawag. Natawidna la ketdi daytoy a galad kadagiti nagannak kenkuana ta managbasada met iti Bannawag.
Adu ti lebbenna a Bannawag ket saanna a malibtawan ti gumatang. Kinaagpaysuanna, nakasako pay dagiti dadduma a lebbenna ta gameng para kenkuana dagiti sinurat iti magasin.
Nupay kasta, daksanggasat ta pimmusay idi Septiembre 15, tallo nga aldaw kalpasan a na-stroke. Agtawen iti 55. Naitanem idi Septiembre 18 iti Alinguigan 1st Cemetery.
Nayanak idi Hulio 23, 1966 iti Alinguigan 1st, Ilagan (siudad itan), Isabela ngem gapu iti panangaskasabana a kas maysa nga ordenado a pastor ti maysa a sekta ti relihion, nagnaedda iti Barangay Minabang iti daytoy met laeng a siudad, kaduana ti pamiliana.
Nagturpos iti Bible College iti Marcos Highway, Baguio City; nangrugi a mangaskasaba idi 1985.
Manipud Kadagiti Agdama a Kameng ti Bannawag: Dios ti Agngina!
Ad-adda nga am-ammo iti birngas a Boy, saanna a maliwayan ti agbasa iti Bannawag. Isu kano ti pagin-inanaanna kalpasan ti trabahona a kas junk ken scrap dealer malaksid iti kinapastorna.
Sakbay a pimmusay, nadakamatna nga iti naminsan nga addan kano met naipablaakna a daniw iti Bannawag idi arinunos ti dekada 80s ken masansan pay nga agsurat iti benneg a Dakami Met ken Netizone.
Naipablaak pay iti Bannawag idi Agosto itoy a tawen ti ladawanna a gumatgatang iti magasin iti newsstand ti Luzonwide News Correspondent Publishing and Newspaper Agency iti Siudad ti Ilagan.
Kinapudnona, pimmusayen idi naipablaak iti Nob. 1-15 a bilang ti Bannawag ti reaksionna iti Hulio 1-15 nga isyu. Babalawenna ti naggibusan ti sarita ni Apo Benjamin M. Pascual a “Ti Bilin ni Baket Tasia” ta kaasi kano daydiay ubing ni Ulling a ni Vicente gapu ta naglak-am iti pannusa a dina met naaramid.
Innem dagiti annakda ken kapisi ti pusona—tallo a babbai ken tallo a lallaki. Napagturposna ti inauna iti Nursing, agtrabtrabaho met sadiay Taiwan ti maikadua a kas welder, Industrial Technology ti kurso ti maikatlo, welder met laeng ti maikapat, ken ages-eskuela iti hayskul dagiti dua nga inaudi.
Para kadagiti kakabagianna, manangngaasi ken managayat unay ni Manong Carlos.
“Maysa nga ama a nadungngo kadagiti annakna ken nasingpet nga asawa. Adu pay dagiti tattao a makaam-ammo kenkuana gapu iti laingna nga agpakatawa.
Awanen ni Manong Carlos. Kail-iliwkonto ti masansan nga isasarungkarna iti puestomi a paggatgatanganna idi iti kopiana a Bannawag. --O
