Ni ANALOU DE VERA
Sumangpet ti umuna a batch ti Molnupiravir, maysa a matomar nga agas a kontra bayrus (oral antiviral) kontra iti COVID-19 iti daytoy nga aldaw, Huebes, Nobiembre 18, kas impakaammo ti Faberco Life Sciences Inc. Ti Merck & Co, Inc. (MSD) ti nangparnuay iti daytoy idinto a napili met ti Faberco a mangiwaras iti pagilian, babaen ti Aurobindo Pharma Ltd a kinatulag ti MSD.
Iti agdama, maidiaya laeng ti Molnupiravir kadagiti ospital, kas mayannurot iti Compassionate Special Permit (CSP) nga impaay ti Food and Drug Administration (FDA), kas impakaammo met ti RiteMed Philippines, Inc., ti napalubosan a mangiwaras iti Molnupiravir kadagiti ospital, institusion medikal, ken lugar a pagagasan.
Kabayatanna, kuna ti Faberco a manamnama ti panangaprobar ti FDA ti Filipinas iti aplikasion daytoy tapno mausar ti Molnupiravir iti pagilian para iti emerhensia a pakasapulan. Itay nabiit, napalubosanen ti nasao nga agas para iti emerhensia a pakasapulan iti United Kingdom.
Segun iti Faberco, maibatay kadagiti resulta ti klinikal a pannakaipadas ti Molnupiravir, kissayan daytoy ti risgo ti pannakayospital wenno ipapatay iti 50 a porsiento para kadagiti addaan iti nalag-an agingga iti saan unay a grabe a COVID-19.
Manipud Kadagiti Agdama a Kameng ti Bannawag: Dios ti Agngina!
Kabayatanna, kinuna ni RiteMed President Jose Maria A. Ochave a mangnamnama a mailako ti Ritemed iti masakbayan kadagiti botika iti Filipinas, kas mayannurot iti panggep ti kompania a mangipaay iti publiko kadagiti dekalidad ken magtengan ti presiona nga agas.
(Damag manipud iti Manila Bulletin.)
