MRS. BANGUI INTERNATIONAL 2020-21. Nabalangatan ni Adora Cascayan Taylor a Mrs. Bangui International 2020-21 iti naangay a taripnong ti Sons and Daughters of Bangui, Inc. idi Septiembre 18-20 iti Las Vegas, USA. Tubo ti Bangui, Ilocos Norte ngem 30 a tawenen nga agnaed iti Amerika a nagdappatanna. Tallo ti bungada ken David Taylor a kaingungotna, da Michael, Johnathan ken Liezel. Tinawen a maangay ti panagtataripnong dagiti kameng ti Sons and Daughters of Bangui, Inc. Binuangay daytoy ni Mr. Marcelo Respicio Garvida idi 2012. Gandat ti gunglo ti tumulong kadagiti kamengna ken padur-asen ti ili a Bangui  a naggapuanda. Addan nasurok a 250 ti kameng  daytoy a gunglo manipud iti nadumaduma nga estado ti Amerika ket addada pay naggapu iti Canada. (Abraham C. Aguino, Jr.)

SIUDAD TI BATAC.  Kas pannakipaset ti Mariano Marcos State University (MMSU) iti pannakarambak ti World Bamboo Day idi Septiembre 18, ken iti Philippine Bamboo Month iti bulan ti Septiembre, naiburay dagiti nadumaduma nga impormasion ken teknolohia maipanggep iti kawayan iti panangidanon ti  Eskuela iti Tangatang (School on the Air) a programa ti MMSU. Nagserbi a Resource Speaker ni Dr. Charlie Batin ti College of Agriculture, Food, and Sustainable Development (CAFSD), Forestry Department. Nairaman kadagiti SOA enrollees a nagmula iti kawayan iti kaaldawan ti selebrasion ni Robert Guiang ti Paoay Ilocos Norte. Kaduana iti ladawan ni Aurora Cacayorin, SOA Coordinator, a nangipaima kenkuana iti patubo. Agtultuloy met ti suporta ti Presidente ti MMSU, Dr. Shirley C. Agrupis, iti daytoy a gannuat. (Teksto: Mercy Gano)