APARRI, CAGAYAN. Kalpasan ti panagsungbatda kadagiti modules-da wenno no kasta nga awan ti klaseda, agderetso dagitoy nga ubbing ti Brgy. Linao, Aparri, Cagayan iti karayan iti abay laeng dagiti pagtaenganda tapno ag-troll-da nga agala iti rissing wenno annak ti rasa. Bassit a bubo ti aw-awaganda iti troll nga agarup maysa agingga iti tallo a metro ti sungabanna. Anusan a guyoden daytoy ti ubing iti igid ti karayan. Inton kapkapnekanna nga addan naala, itakdangna daytoy ket ipanna iti planggana nga adda danumna a nakagalut laeng iti siketna tapno uray sadino ti pakadanonanna, adda madadaan a pagikkanna. Dua a pisos agpangato ti bayad ti maysa a rissing depende iti kadakkelna. Addada komersiante a sidadaan a gumatang kadagitoy. Aggapuda pay iti probinsia ti Pangasinan no dadduma. Ar-aramiden dagiti ubbing iti nasao a lugar daytoy tapno makatulongda kadagiti nagannak kadakuada ita a panawen ti pandemia. (Ladawan: ANNA LIZA F. PALLAGO-ADOLFO | Teksto: JOBERT M. PACNIS)

(Naipablaak iti Nobiembre 16-30, 2021 a bilang.

Kadagiti kayatna ti ag-subscribe iti e-Edition, mapan iti ania man kadagitoy a link: Press Reader wenno iti Magzter.

Para iti naimaldit a kopia, ag-email iti [email protected] wenno kauman ni Boy Balanag iti CP Number 0916 269 2390

Laglagipenyo koma met, kakailian, nga i-like daytoy FB Page ti Bannawag Magazine. Dios ti agngina.)