Ni JUNLEY L. LAZAGA
Nagun-od ni Frank Cimatu ti Siudad ti Baguio ti kangrunaan a pammadayaw iti maika-20 a Madrigal Gonzalez Best First Book Awards iti kategoria a Filipino para iti umuna a librona a napauluan iti Ang Mga Prusisyong Dumaan sa Unang Bangungot nga impablaak ti Ateneo de Naga University Press idi 2018, kas naipakammo iti online a programa nga insayangkat ti Likhaan: University of the Philippines Institute of Creative Writing a naangay itoy a Biernes, Nobiembre 26, 2021.
Maipapaay ti nasao a pammadayaw iti kapipintasan nga umuna a libro ti maysa nga autor a Filipino. Ininaw ti University of the Philippines (UP) Institute of Creative Writing (ICW) daytoy a pammadayaw idi 2001 babaen ti pannakitinnulong ti pamilia Madrigal-Gonzalez. Addaan iti kangrunaan a panggep a manggutigot iti ad-adu pay a panagputar iti literatura ken panagilibro, agsinnublat a maipapaay ti pammigbig para iti kategoria ti Ingles ken Filipino iti tinawen.
Para iti daytoy a tawen, naggiddan ketdi nga inlungalong ti Likhaan UP-ICW ti maika-20 ken maika-21 a pammadayaw ti Madrigal Gonzalez gapu iti saan a pannakaangay daytoy idi napan a tawen gapu iti pandemia.
Iti benneg ti Filipino a nangabakan ti libro ni Cimatu, nagpaay a hurado da Jun Cruz Reyes, Carlos Piocos III, ken Genevieve Asenjo.
TURISMO: Intayon Idiay Ayuyang Garden iti Pila, Siudad ti Laoag!
Iti benneg ti Ingles, inyalat met ti Wing of the Locust ni Joel Donato Ching Jacob ti pammadayaw. Nagpaay a hurado da Marjorie Evasco, Sarge Lacuesta, ken Charlson Ong.
Buklen ti tallopulo ket siam a dandaniw ti libro ni Cimatu a kaaduan kadagitoy ti nasurat idi dekada 1990.
Maysa a mannaniw ken beterano a periodista, nayanak ken dimmakkel ni Cimatu iti Siudad ti Baguio manipud iti kaamaan a nagtaud iti Ilocos Norte. Maysa kadagiti nakipagbangon iti Baguio Writers Group iti maudi a paset ti dekada 1980 ken agtultuloy a mangibagbagnos kadagiti naub-ubing ngem isuna a mannurat aglalo kadagiti kameng ti Ubbog Cordillera Writers. Nagbalin a fellow ti 1988 ken 2010 UP National Writers Workshop ken nangab-abak iti premio manipud iti Palanca, Procyon, ken Philippine Free Press para kadagiti daniw ken salaysayna iti Filipino ken Ingles. Agpapaay pay kadagiti NGO nangnangruna iti maipapan iti panangsaluad ti aglawlaw, karbengan dagiti patneng wenno nagkakauna nga umili, ken panangitandudo iti karbengan mainaig iti reproduktibo a salun-at ti tao.
