Ni AHIKAM PASION
Mabalinen nga agawid dagiti residente ti Ilocos Sur a saanen a masapul nga agdalan iti quarantine ken dadduma pay a test a mainaig iti COVID mangrugi iti daytoy a Mierkoles, Disiembre 1, no la ketdi kompleto ti pannakabakuna dagitoy.
Daytoy ti impakaammo ni Gobernador Ryan Luis Singson ti Ilocos Sur idi Sabado, Nobiembre 27.
Kinuna ni Singson a masapul laeng nga ipakita dagiti agawid a residente ti Ilocos Sur ti vaccination card dagitoy kadagiti checkpoint iti beddeng ti probinsia.
Saan metten a masapul nga agdalan pay dagitoy iti quarantine.
Manipud Kadagiti Agdama a Kameng ti Bannawag: Dios ti Agngina!
Iti biang dagiti tattao nga umuna a dosis pay laeng ti bakunada, agdalan dagitoy iti 14-aldaw a kuarantina.
Iti programa daytoy iti radio, kinuna ni Singson a daytoy ti wagasda a mangallukoy kadagiti kakailianda tapno agpabakunada.
Ginutigot pay ni Singson dagiti dadduma pay a residente ti Ilocos Sur nga agduadua a mabakunaan a saanda koma nga agbalin a managimbubukod; ketdi, panunotenda koma dagiti kakabagianda a mabalin a maakaran no bilang agsakitda iti COVID.
Iti ketdi pannakaisursurat daytoy, saan pay a nairuar ti kompleto a pagalagadan mainaig iti daytoy nawaywaya a pannakaipalubos dagiti residente ti Ilocos Sur nga adda kadagiti sabali a lugar nga agsubli iti probinsiada.
(Damag manipud iti Manila Bulletin.)
