Ni ELISEO B. CONTILLO
Indauluan da Bise Mayor Pablito Sanidad, Bokal Pablito Sanidad Jr., Municipal Administrator Pablo F. Sanidad II, ken dagiti kameng ti Sangguniang Bayan ti Narvacan, Ilocos Sur, ti inaugorasion ti Cong. Pablo Sanidad Building iti San Pablo Elementary School (SPES) idi Nob. 15, 2021.
Ti gobierno lokal ti Narvacan nga idauluan ni Mayor Luis “Chavit” Singson ti nangibaklay iti pannakabangon ti pasdek.
Ti Cong. Pablo Sanidad Building ti naisukat iti daan a pasdek a binangon pay daydi Dip. Pablo Sanidad idi dekada 60s a panagpaayna a mangibagi iti Maika-2 a Distrito ti Ilocos Sur iti Kamara.
Mabigbig daydi Congressman Sanidad a maysa kadagiti kangrunaan a nangitandudo iti edukasion iti probinsiana, kas paneknekan dagiti adu a pasdek ti pagadalan a binangonna iti segundo distrito ti probinsia a pakairamanan ti dati a Narvacan School of Fisheries iti Brgy. Sulvec, ti pasdek ti pagadalan iti dati nga ISAC iti Sta. Maria, ken kadagiti sabsabali pay nga ili ti probinsia.
Timmabuno iti inaugorasion dagiti dadaulo ti gobierno lokal, empleado, ken dagiti opisial ti barangay, ken ti entero a DepEd-Narvacan South District.
Indauluan ni Fr. German S. Somera, Kura Paroko ti St. Joseph, the Husband of Mary Parish, ti pannakabendision ti nasao a pasdek.
Kalpasan ti inaugorasion, naiwaras ti tallo a Narvacan Ako 3-wheels vehicle kadagiti nadumaduma nga organisasion sibiko, ken nayawat dagiti relief packs kadagiti amin a mangisursuro iti Narvacan South District.
Indauluan ni Bise Mayor Pablito Sanidad ti Narvacan, Ilocos Sur ti inaugorasion ti Cong. Pablo C. Sanidad Building iti San Pablo Elementary School, San Pablo, Narvacan, Ilocos Sur. Nairaman iti ladawan dagiti dadduma pay nga opisial ti turay a pakairamanan da Bokal Pablito Sanidad Jr., Municipal Administrator Atty. Pablo F. Sanidad II, dagiti kameng ti Sangguniang Bayan, ken dagiti mangisursuro iti SPES nga idauluan ni Ms. Rowena G. Hermano.
