Dua a Daniw ni HONOR BLANCO CABIE
1
no nakapagraepda, no awan
coronavirus a nagarang 'ti
tunggal balay, iti kakellengan
TURISMO: Intayon Idiay Ayuyang Garden iti Pila, Siudad ti Laoag!
aganida koman annak puli.
pagsubliek oras panawen, sadiay
makitak ti simbeng ken tunosda
agkakalugaran 'tay pagay 'tay
anien, betbetteken tagnawada.
sakbay nga agmatuon pay la ngem
masirpatkon mapan mangbalon, 'tay
pamedped 'ti bisin nga agmalem,
nakaiggen dungdong ken karatay.
naragsakda a sumango't panganan,
di adayo iti kakellengan.
2
anian kabassit-usitna daydiay
ilemlemmeng ni homer no adda't
pagaaduan, awan panagrimat
matan’ helena,** di mamurmuray.
ay, masmasdaawak ta sapay met
ngamin bassit 'diay billit tulengda,
nalabit nga umapalda ngata,
no 'tay dakkel la unay maipaet.
no siak dromornis stirtoni** daydiay
ikitkitikitko't babat' pus-ong,
maysa a pagpanakkel, pagtangsit,
daytay pudno mangted ti linglingay.
awan ngatan sapulem a sab-ong
no mabukodamon daydiay sam-it.
*homer kaibatogan ti kari kadagiti griego.
helena kayatna a sawen 'napintas' wenno
'naraniag a lawag' a naggappu kadagiti
griego.
***ti dromornis stirtoni a nagpayak, sakbay
a naawan adda 8 milion itan a tawen, isu ti
kadakkelan a tumatayab ditoy lubong, agtayag
10 a kadapan, agdagsen dandani 450 a kilo,
kas kadagsen ti maysa a piano.
