Daniw iti Parparaangan ni JENNILYN VELASCO SACULLES

Tawen dua ribu ket siam nagdaliasatak
Adayo a daga ti Lebanon ti nakaisadsadak
Pagilian dagiti Arabiano a pakitagabuak
Nga isut' naturongko a pakiteggedak.

Nagwayasak, adayo a disso, naisangrat
Naipaigid pay la da iliw, tuok ken rigat
A ginaburan ti klima a saan a nasayaat
Pudot a nagpaiduma, agtudo pay iti darat.

Saan nga amin nga OFW nga umadayo
Makasarak  met iti nasingpet nga amo
Adda maitumpong a sumagmamano
Iti amo a nadang-as ken barumbado.

Gapu’t kinarigat ti namulagatan a biag
Pinadaskot' umadayo a makigasanggasat
Tapno magun-odko dagiti tartarigagayak
Nga isut' arapaapko a kalkalikagumak.

Nasumonsumon a sakripisio iti yaadayok
Iti dana ti biag, ibilangko ida a pannubok
Kired ken pigsak sapay 'ta di mapugsot
Tapno kalikagum a korona, innak magun-od!