Ni CLES B. RAMBAUD

Mayalnag itoy maika-9 ti Disiembre ti kaudian a nakatiponan dagiti daniw ni Honor Blanco Cabie, mannurat ti Bannawag ken agdama a Night Editor ti Manila Standard, iti maika-16 a tinawen a taripnong ti NAKEM Conference babaen ti Zoom.

Kadua ni Cabie, tubo ti Pinili, Ilocos Norte, dagiti uppat pay a mannaniw a mayalnag dagiti libroda, da Dr. Aurelio S. Agcaoili ti University of Hawaii; Dr. Orlino ken Mrs. Estrella Baldonado (Angalo ken Aran), ken Dr. Alvin B. Gaerlan (The Almighty Moves Mountains; Dungdung-aw/Lamentations).

Dagiti pito a libro iti Ilokano ken Ingles ni Agcaoili: Paraoir Poems; Covidizado Dagiti Aldawtayo/Our Days are Covidized; Elsewhere/Iti Sabali a Disso; Pardanon/Consummated/ Konsumado; Bayengyeng; Ayamuom; Pagsasao (edited with introduction); Adda Sara ti Dadaulo Ken Dadduma Pay a Sariugma/The Leader Has Horns and Other Tales.

Dandani 100 nga akademiko ken adda iti labes ti akademia ti nakarehistro iti daytoy a panagtitipon a pangtamingan dagiti napusgan a mangipresentar kadagiti papelda dagiti topiko maipanggep iti “Indigenous Communities & Languages, and Engaged Inclusion for Civics and Citizenship.”

Mairaman iti daytoy a taripnong dagiti kameng ti Nakem (National Alliance for Knowledge, Empowerment and Meaning) Philippines, Nakem Hawaii, Nakem California, Nakem Canada, ken Nakem Without Borders.

Impablaak ti Hoaeae Publications iti Marikina City ti libro ni Cabie a Dandaniw (Poems) a nakatiponan ti dandani 70 a soneto – Shakespearean, Petrarchan ken Spenserian – manipud iti dandani 65,000 a soneto a naikur-itna manipud idi 1964 – ken 20 a cinquain, haiku, tanka, palindrome, ken villanelle.

Ni Agcaoili ti nangisurat ti introduksion iti libro ni Cabie. Dagiti daniw nga inurnos ti buridek ni Cabie, ni Heracles Lord Bernardo, tamingenda ti kabibiag ti maysa a managpaliiw nga agnanaed iti siudad, maysa nga adda iti newsroom ken mangisursuro iti unibersidad, ken maysa a dakkel a lalaki dagiti annak ken appokona.

Agsursurat ni Cabie iti Ilokano, Ingles, ken Filipino. Nagun-odna ti 1^st Prize iti Poetry Writing Competition ti 16^th World Congress of Poets idi 2000 iti paliiwna iti kabibiag dagiti ubbing kadagiti kalsada nga awan maturoganda iti marigrigat a siudad.