Inyalat ni Rene Boy Abiva ti pammadayaw iti 11th Pinduteros Choice Award ti HR Online Philippines ken ti British Embassy-Manila iti kategoria nga "Off-the-Shelf."
Tinawen nga ang-angayen ti HR Online Philippines ken ti British Embassy-Manila daytoy a salip ket daytoy metten ti maikadua a gundaway a napadayawan ni Abiva.
Nabigbig ni Abiva iti kategoria nga “Off-the-Shelf” wenno ania man a naimaldit a material kas iti libro, diario, pamphlet, ken poster nga addaan iti dakkel a kontribusion iti pannakasalaknib ken pannakaital-o dagiti karbengan dagiti tattao wenno human rights. Ti libro ni Abiva a napauluan iti Tuligsa At Iba Pang Mga Tula, 2018 ti naipaayan iti nasao a pammadayaw.
Impablaak ti Pantas Publishing idi 2018, addaan iti 140 a panid ti libro nga ilaklako ti Popular Bookstore ken addaan iti pakauna ni Jun Cruz Reyes.
TURISMO: Intayon Idiay Ayuyang Garden iti Pila, Siudad ti Laoag!
Kuna ni Egay Cabalitan a head organizer ti HR Online Philippines a napili ti libro gapu iti panangtratar daytoy iti human rights a maysa kadagiti sarsarangten ti agarup amin a pagilian iti agdama. Dinakamat pay daytoy a dayaw ti pagilian ni Abiva ta maikadua daytoyen a pammadayaw a naawatna manipud iti Embahada ti Britania.
Is-isponsoran ti British Embassy-Manila ti nasao nga aktibidad kas pannakimaymaysa daytoy iti International Human Rights Declaration a mailaglagip tunggal Disiembre 10. Nagpaay ti HR Online Philippines a katinnulongna.
Malaksid a mannaniw, maysa pay ni Abiva a nobelista, editor, eskultor, pintor, ken agiwarwarnak. Tubo ti Nueva Vizcaya ken agnanaed iti Siudad ti Cabanatuan, nagturpos ni Abiva iti PUP ken agdama a lepleppasenna ti Masterado iti Malikhaing Pagsulat iti UP Diliman.
Nakaawat metten kadagiti fellowship grant a kas iti Palihang Rogelio Sicat (2018), Cordillera Creative Writers Workshop (2018), Jeremias A. Calixto Ilokano Writers Workshop (2019), UP National Writers Workshop (2019), ken Palihang Linangan sa Imahen, Retorika at Anyo (2021). Itoy 2021, pinadayawan ti GUMIL Filipinas, Bannawag Magazine, ken National Commission for Culture and the Arts a kas Pasnaan 9 Outstanding Fellow. Kameng iti GUMIL Filipinas iti chapter daytoy a GUMIL Metro Manila.
Pundador ti Samahang Lazaro Francisco, opisial pay iti Order of the Knights of Rizal-Cabanatuan City ken Independent Order of Odd Fellows-Nueva Ecija Lodge, UD.
Naiwayat ti online a pammadayaw itay Nobiembre 30, 2021 babaen ti Zoom. (ARIEL SOTELO TABAG)
