Daniw iti Parparaangan ni JONALYN BUDUAN LABRADOR
Nangayed nga arapaap, isut' nakaigapuan
Awis ballasiw-taaw 'tay innak tinukmaan
Balonko ti tured ti pakinakem, isu ti igam
A makisaranget tapno laeng makalung-aw.
Nupay panagaripapa di makaidna iti kaunggan
Apaman a nabaddekak daga a nakaisangladan
Lua nga agpilit a rumkuas, diak pulos imbuang
Dinawatko iti Apo a saannak koma a baybay-an.
Biag ditoy ballasiw-taaw, diak man mailadawan
Narigat a nanam-ay no trabaho ti pagsasaritaan
Nanam-ay no nasingpet nga amo’t matumpongan
Narigat met no amin a garaw isu ‘tay masipsiputan.
Kasasaad ti maysa a paad-adipen, awan pumada
Maliwayan oras ti pannangan gapu ta gabur ti obra
Arigna makisalisal bannog ti bagi di pulos iginggina
Tapno di kusilap ti lak-amen sakbay oras panaginana.
Kanito a madanon oras pannaturog nupay naladawen
Bagi 'tay nautoyan gapu ta pannakigubal nga agmalmalem
Rikna man 'tay masnaayan ta ti oras ket nagligsayen
Kumidagen ni iliw, pagam-ammuan luluat’ maregregen.
Adda dagiti gundaway panagsagaba ni lasag malak-am
Anian a gasat no amo awan marikna a pannakipaglak-am
Lasag nga adipen ni sakit, bumangon a makidangadang
Ta isu ti akem a nakaisangolan, nupay di koma mabaelan.
Tiempo a madanon pannakaawat naituyang a sueldo
Kasla aglabas laeng nga innipis iti lukong dakulapko
Pamilia a puon innak yaadayo, agur-urayen ipatulodko
Ti apagkanito a pannakaapros, resibo isunton ti imetko.
Pamilia a gameng, ipatpateg a pangisagutan sakripisio
Isuda ti linaon panunot, tunggal panagtayyek ti kanito
Arapaap a nakaibinggasan dagiti tuok a mangdudog puso
Di agsarday a panagsammaked igamko kaaddaak adayo.
Ngem anian nga angaw ni gasat immay a manglimlimo
Kalkalikaguman a rimat ti masakbayan daytay nagngudo
Desdes ti nangayed nga arapaap namimpinsan a naikulbo
Nasam-it a bunga dagiti sakripisio nagbanag a sanaang ti puso.
Biag ti maysa nga OFW napnuan iti pannakidangadang
Ibaklayna ti adu a pangitured namnama inna aywanan
Ikawesna ti di agsarday panagun-unnoy iti Ama a Nailangitan
Buyogan naunday a sakripisio, magun-od gin-awa a tarigagay.
