Dua a Daniw ni HONOR BLANCO CABIE
1
agmurmuraykayon, kailian, ta
sabtentayon da apo musiko,*
mangiwarwaragawag 'tay waya
Manipud Kadagiti Agdama a Kameng ti Bannawag: Dios ti Agngina!
nagun-od 'toy barangay, 'tanudko.
bambanti nga agbitimbitin 'ti
sidiran kaminoreal ili ta
saksi't natayag a ragsak puli --
libnos ken sudi 'tay panagmaysa.
nagsat kadenan imparautda --
nangisit pay lat' wak** nga adda sadiay
kelleng yan kabkabrong ken bakbaka,
barissanga, daytay puriket pay.
appupuen barbaro nga angin, 'tay
mangted nam-ay, namnama ken rang-ay.
*banda ni julian mercado, taga-capangdanan.
**basaen ti Pinili Metamorphoses Into Motion
(footnote 12, page 186: kuna dagiti opisial ti ili
a badoc: 'purao ton ti wak no macapagmuicipio
ti pinili.'
2
mil nueve y cientos beinte -- umuna
nga aldaw ti bulan ti enero,* ay!
adda ragsak iti barangayda,
addan pagtangsit a maisalapay.
ta naipusingen ti barangayda
kadagiti tallo a nagsusuan
nga ili** yan tallo nga ayugda,
maymaysadan ngem ayugda anian.
adda i-paoay, 'tay i-badoc, 'tay
pay i-batac ngem maymaysa latta
daydiay riknada a maisalapay
no 'tay sarabuendat' bisitada.
nagilin 'diay binaragan nengneng,***
isudan ari't bukod a taeng.
*aldaw ti huebes.
**paoay, badoc, ken batac.
***basaen ti Pinili Metamorphoses Into Motion
(footnote 20, panid 180, kuna dagiti opisial ti
Badoc kadagidi a panawen: 'Dida sumupadi
ta ni la nengneng cadacuada ti adu.'
