Tallo a Daniw ni HONOR BLANCO CABIE
1
adu 'tay samiweng, sang-aw ken 'tay
pay sirmata adda sirnaatna,
sang-aw a paginuduan karkarma --
Manipud Kadagiti Agdama a Kameng ti Bannawag: Dios ti Agngina!
ay! gameng 'diay sang-at* mangitag-ay.
adu 'tay samiweng a mangngegak
no 'diay sang-at daytay madanonko,
'tay kiaw, perperroka naka'd-adu,
ay! ta sigpatendat' babannogak.
sang-aw 'diay bakir ken kasta met 'diay
kakellengan, sadiay kaabayda
makariing a sirmata kaniak --
am-amin dagitoy mangmurmuray.
isuda a tallo ilutenda
'toy karkarmak, 'toy muging ken riknak.
*paset ti barangay upon, pinili, ilocos norte,
naaplagan iti taltalon; abay dagiti turod ken bantay.
2
sang-at
paraanganna
pagay-ayamanmi
siak ken karkarmak
daytoy pagtaenganmi
agin-innalaankami ditoy
garakgakmi agal-allangogan
awan pulos pannakabambannogmi
payak addaan kaay-ayammi agmalmalem
barissanga bakbaka kabkabrong lumangtoda.
~taeng karkarma~
lumangtoda kabkabrong bakbaka barissanga
agmalmalem kaay-ayammi addaan payak
pannakabambannogmi pulos awan
agal-allangogan garakgakmi
ditoy agin-innalaankami
pagtaenganmi daytoy
karkarmak ken siak
pagay-ayamanmi
paraanganna
sang-at.
3
Kalgaw man a bumegbeggang,
nepnep nga awanan darang,
'ti taltalon ken pangablan
kinagaget masirpatan.
Dekadan nakawaswasnay
i-Pinili maitagtag-ay,
gapuanan in-inauna,
kalangtayan ti sirmata.
Dakami nga inaudi
saksi't sin-aw ken 'tay sudi,
gandat amma a nangbukel
Pinili pagpampanakkel.
Tallo man aweng ayugmi
maymaysat' muging, riknami,
bugas ling-et di baybay-an,
silawmi't dana't sanguanan.
Kanayon irakurakmi
nagbannogan a maani,
ken Apo Dios 'toy yamanmi
awan pulos makasali.
Kararua ken kannawidan
kinagaget pagaaduan,
madaydayaw ken pagtamdan,
ugali ti sangkailian.
