Maysa ni retirado RTC Judge Joven F. Costales, kolumnista ti Bannawag, kadagiti napadayawan a 10 a Naisangsangayan a Nataengan  iti panangrambak   ti gobierno probinsial ti La Union  nga idauluan ni Gob. Francisco Emmanuel “Pacoy” Ortega III iti Filipino Elderly Week.

Kadua ni Judge Costales (Naguilian) a napili da: Gabriel Sotto (Bauang), Cecilia Reyes (Luna), Ma. Minda Fontanilla (Bacnotan), Teresita Rivera (Sto. Tomas), Natividad Pelaez (Siudad ti San Fernando), Teresita Opena (Santol), Felicitas Macazo (Bangar), Leo Boguing (Sudipen), ken Rogelio Tangalin (Agoo).

Napili idin ni Judge Costales, presidente ti asosiasion dagiti senior citizen iti Barangay, Municipal, Provincial, Regional; ken agdama a Bise Presidente ti National FSCAP, a maysa kadagiti Naisangsangayan a Senior Citizen iti Filipinas.

Agpapaay met ni Sotto a konsehal ti ilina a Bauang; ni Reyes, presidente ti Senior Citizens ken PWD Federation; ni Fontanilla, nagmayor iti adu a tawen iti Bacnotan; ni Rivera, presidente ti pederasion dagiti SC; Pelaez, presidente ti pederasion dagiti SC iti Siudad ti San Fernando; Opena, maysa a health worker; Macazo, OSCA Head; Leo Boguing, managtulong nga SC iti ilida; ken Tangalin, retirado a propesor ken presidente ti barangay association ti SC.

Nayawat ti sertipiko dagitoy a nataengan a pinirmaan da Gobernador Ortega, Bise Gobernador Mario Eduardo Ortega, ken dagiti 13 a kameng ti hunta probinsial.

(Naadaw iti Disiembre 16-31, 2021 a bilang ti Bannawag.)