Daniw iti Parparaangan ni ROSE CARBOLLEDO GACUSAN
Iti irurusingmo nariing ni arapaap
Magagaran dita sibay nga agampayag
Sidongmo agtalinaed, agpasagak
Bang-ar ti marikna daytoy kaunggak.
Agdaliasatak latta agingga a sika ti maragpat
Bituen tangatang ubonek ida ditoy dakulap
Awan panagaripapa kadagiti siit a baddekak
Umaddangak latta uray bangen lappedannak.
Sarakusokek dagiti mangludonludon a dalluyon
Ilangoyko iti taaw ti kabukbukodak a lungon
Yablatnak man ti dawel iti makaaliaw a gungugong
Lumung-awakto latta ingga’t isem ti maibangon.
Kabuyogko dagiti billit iti inda panagtayab
Tun-oyek sanga a pagbatayak a makigasanggasat
Idayyengkonto ti sam-it sonata ti panagdaliasat
Ket rumkuasto iti kaunggan ti paspasimadek a ragsak
Para Kadagiti Agdadamo a Mannurat: Salip iti Sarita ti Norberto D. Bumanglag Jr. Literary Awards
Ti panagukrad dagiti rosas a tinartaripato
Umayamuom ti bangloda, bang-ar ditoy puso
Pinurosko metten ket ditoy barukong insab-itko
Nasam-it nga isem balligi naragpat nga addaan rag-o.
