CALASIAO, Pangasinan — Maysa a naubing pay a mannalon ti nakaduktal iti wagas a pangrisut iti adu unay nga apit a nateng iti ilina babaen ti ‘Pinakbet’ chips.

Inusar ni Allan Padilla, presidente it 4H AgriKuli Dinalaoan Club, ti naawatna a tulong manipud iti Department of Agriculture (DA) a pinanggatang iti dehydrator machine, vacuum sealer, ken powderizer machine tapno makaparnuay iti makapasalun-at a pamedped (snack) a makatulong pay kadagiti mannalon iti ilina.

Kuna ni Padilla a napanunotna ti Pinakbet chips iti pannakaimatangna iti problema dagiti mannalon iti panagsobsobra ti suplay dagiti nateng.

Iti innuman itay Disiembre (Biernes, Disiembre 3), kinuna ni Padilla a nadakamat dagiti mannalon a kaykayatda payen ti agobra iti konstruksion ta malugida laeng gapu iti kinalaka ti nateng a maigapu met iti kinaadu ti apit.

Rinugian ni Padilla ken dagiti padana a kameng ti klabda ti nagibilag kadagiti nateng a kas iti taraong, okra, kamotit, utong, karabasa, ken pallang a maaramid a Pinakbet chips. Ti pagdaksanna, no dakes ti tiempo, madadael dagiti nateng ta kapten dagitoy ti buot. Daytoy ti gapuna a napanunotda a nasaysayaat koma no addaanda iti dehydrator.

Kinuna ni Padilla a nakisalip iti Kabataang Agribiz Competitive grant assistance program ti DA ket nangabak iti provincial level a nangyalatanna met iti limapulo a ribu a pisos (PhP50,000) a grant. Daytoyen ti inggatangna kadagiti masapsapul a makina.

Makatulong met kadagiti agtutubo, agraman kadagiti saan nga agbasbasa, ti panagaramid iti Pinakbet chips ta makaganarda iti nayon a kuarta a para kadagiti masapsapulda.

Segun ken ni Padilla a babaen dagiti makina, makapataudda iti 150 a pakete a sag-100 gramo a Pinakbet chips iti linawas.

Kinunana nga ilaklakoda dagitoy iti lugarda ken panggepda ti aglako pay kadagiti Pasalubong Center, ken kadagiti eskuela a kas nayon a pagpilian dagiti ubbing iti pamedped inton maipalubosen ti ipapan dagiti ubbing iti pagadalan.

Innayon ni Padilla a nagtalinaed ti imet a nutrision dagiti nateng ta inikkat laeng ti dehydrator ti danum manipud kadagiti nateng a saan ket a dagiti sustansia dagitoy.

Kuna pay ni Padilla a natural amin a rekado ti Pinakbet chips a buklen ti napolbos a bawang ken lasona ken saan a nalaokan iti preservatives.

Mailaklako ti Pinakbet chips iti wholesale a presio a P45 agingga iti P75.

(Naadaw iti Philippine News Agency ken Manila Bulletin.)