Pimmusay ni National Artist for Literature F. Sionil Jose iti tawenna a 97 idi rabii ti Huebes, Enero 6, bayat ti pannaturogna ken sakbay nga aglasat iti operasion iti angioplasty iti Makati Medical Center, kas impakaammo ti kaingungotna, ni Tessie Jovellanos Jose.

Maysa a patneng nga Ilokano, nayanak ni Jose iti Rosales, Pangasinan, a pinagbalinna a nakapasamakan dagiti nobelana a nangtaming met iti panangipinget dagiti gagangay nga umili kadagiti kalinteganda.

Nakaisurat ni Jose iti 14 a libro a pakairamanan ti “Waywaya,” ken ti nalatak a Rosales saga a buklen ti lima a nobela:  “The Pretenders” (1962), “Tree” (1978), “My Brother, My Executioner” (1979), “Mass” (1983), “Po-on” (1984).

Naipatarus iti di nakurkurang ngem 27 a lengguahe dagiti sinuratna a sarita nangruna dagiti nobelana.

Mairaman ditoy ti sumagmamano a saritana a naipatarus iti Ilokano ken naipablaak iti Bannawag agraman ti nobelana a “Dagiti Mangliliput” (“The Pretenders”).

Idi 1980, naipaay kenkuana ti Ramon Magsaysay Award for Journalism, Literature and Creative Arts.

Makalawas sakbay, pimmusay ti balasang ni Jose, maysa met a mannurat ken civic advocate, idiay San Francisco.