Dua a Daniw ni HONOR BLANCO CABIE
1
ay! nalipatandan nagnaganyo,
pati gapuananyo idi gubat --
o dios ama, dawatek 'tay kaasiyo.
Manipud Kadagiti Agdama a Kameng ti Bannawag: Dios ti Agngina!
saan a sinsinan impagtengyo
a sakripisio't dara a pimsuak --
ngarud rumbeng la unay 'tay bato.
dadduma ta naikkanda't adu
a monumento a mataltaldiap:
ti ilik lipatnan daytay pudno.
anian a kinadaksanggasatko,
awan man la daytay mangted rimat
no 'tay lumnek ti init dalanko.
bay-ak latta koman ngem mugingko,
o dios ama, daytoy matagtagbat --
lagip awan iti gapuananyo.
o dios ama, daytay bendisionmo
maited koma't daras tapno rimat,
ellek rikna 'tay mangited adu
nga anges, panagyaman asiyo.
2
ala, kakabsatko, ammak ida,
pati payen sagibsib a naruay,
o dios bendisionmo yetnag ita.
ni maysa a bato awan man la
a mangsukat koma't panagliday,
lagip kadakayo awan latta.
isingsingasing muging ken rikna,
pati karkarmak a masuksuklay,
adda koma bato makitada.
ti ilik kas man la awan rikna,
awan biang 'ti tugot da lallakay
nangisalakan ti kailianda.
daras 'toy mugingko maraprapa
a ta saan man a masirip 'diay
kinamaingelyo nga inauna.
ay-aykay pay, ngem dikay nga aglua,
yetnagtot' panawen 'tay linglingay --
o dios ama luktam panagrikna
ni ipinili 'ti gapuananda.
