Tallo a Daniw ni HONOR BLANCO CABIE
1
perngek ti init 'ti pammatik 'tay
pamigsa 'toy kararuak ken bagik
masukdalko tapno daytay ay-ay
TURISMO: Intayon Idiay Ayuyang Garden iti Pila, Siudad ti Laoag!
'ti biahek 'ti malem di mangtugkik.
barbareng 'ti innak panangperreng
mariknak a sumurbot 'toy pigsak,
iti panagbaniagak 'tay buteng
paksiaten mugingko ken karkarmak.
napigsa ti pammatik dinakto
baybay-an a pulos ti dios ama
'ton umikkatakon 'toy lubongko,
inton panawakon rabaw daga.
saanak a mapurar 'ti innak
panangperreng -- dumteng kaniak pigsak.
2
ti dios ama, pati dadakkelko,
isagutko panunot ken riknak,
isuda nga ubbog daytoy pigsak,
pigsak imbaklayko 'ti lubongko.
pigsak daytoy diak binukodan ta
kayatko a badangan dagiti
adda't aglawlawko 'ti rabii
kasta met 'ti aldaw isu latta.
panunot ken riknak isuda 'tay
inig-igpilak a nagmalmalem,
nagpatpatnag iti nagnagnaak
tapno kalugarak maitagtag-ay.
aramidko indatonko't laem,
kaduak a nangisagut karkarmak.
3
perngek lawag 'diay init ket kunak
apaglikig met pay la gayam, ay!
adda pay la wasnay ti pagnaak,
adda watiwat pay panagtaray.
ita iti nabati a wasnay
un-unorek, innak pagpagnaan,
gandatko kakailiak maitag-ay
tapno saanda a mayaw-awan.
adda man 'tay kinanumok, awan
man kinawadwadna 'toy gamengko,
isu daytat' bukbukod puonan,
bay-akon no bassit 'ta a bato.
manen ituloykot' panangperreng:
agyamanak saanak nga agbaeng.
