Daniw ni ARNOLD C. BAXA

Saankan sa met a dumdumngeg
Idi saludsodek: Pangitabonak
Kadagiti lagip?
 
Sangagasut ket limapulo ket innem
A daras a sinarsarungkaranka.
 
Tunggal umayak, sakruyko ti sangapulo ket tallo a rosas
A bin-ig a puraw, ti paboritom: Awanan mantsa, nadalus, 
Nasin-aw, nadarisay.
 
Kaarngida dagiti nakapudpudaw, nakapurpuraw
Nga ulep nga aglaylayag iti ngatuen
Ti Valley Isle Memorial Park.
 
Idi naglibaska a pimmanaw, saanen a siak daydi siak:
Adda pasetko nga inka intalaw, adda pasetko 
A pimmusay…
 
Nagdardara daytoy pusok, napukpukawko 
Daytoy panunot; ngem kimpetak iti pammatik 
A dinak baybay-an!
 
Ita, a maikatlo nga anibersario ti panaglibasmo 
A pimmanaw, adtoyak manen
A nakaparintumeng iti sakaanam…
 
Sakruyko ti sangapulo ket tallo a kaketkettel 
Nakatartarnaw, nakapurpuraw a rosas
Sagutko iti pannakailagip ti itatallikudmo…
 
Iti panangiruknoyko kadagiti sabong, kayatko a panunoten
Nga impariknam ti kaaddam iti panangapiras kaniak ti pul-oy.
Umdas kadin ti tallo a tawen? 
 
Agyamanak ta pinalubosannak nga ayatenka.
Naparaburanak ta pinagbalinnak a paset ti biagmo, ken iti ad-adu pay
Nga ayat nga insubadmo
Sikanto latta ti agnanayon nga ayat ti biagko…
 
Iti panagsublik iti luganko, nakalaglag-an dagiti dapanko nga immaddang
Inagkannak ti salemsem nga insangbay dagiti dalluyon ti Waiehu Bay,
Iti langit, agandapen dagiti bituen iti panaginnagaw 
Ti sipnget ken lawag. 
 
Diak ammo, ngem iti panangpanurnorko iti Hana Highway, 
Nagsikkoak iti kanawan: Iti Spreckelsville, ti nagpanawan a kampo
Dagidi mangmangged iti kaunasan.
 
Ditoy a nainaw ken naipasngay dagidi nasin-aw nga arapaap: 
Ditoy ti nakasursuruak nga agayat ken paayat,
Nga agragsak iti balligi, a mangaklon iti pannakapaay.
 
Mangrugiak kadi manen?
 
Kayatko pay ti agdarepdep, ti agarapaap.
Kayatko pay ti agayat, ti mapaay, ti pumusay, 
Ti umisem, ti agdaniw manen…
 

(Immuna a naipablaak iti Sept 1-15 2021 a bilang ti Bannawag.)