Dua a Daniw ni HONOR BLANCO CABIE
1
dakay a nakibalbalubal 'di
dumupir tropa ti amerika,
dakay nga annak maingel a puli,
5 a Daniw
itakderyon, nagbungan parmata.
nalabit a sinurutsurotyot'
bittag ken bilin ni aglipay* ngem
ammok adda met kadakay tugot
ni natured nangbuangay 'toy raem.
iti ballasiw pannakigubat --
dadduma naiwalwalang pay dana --
barangayyo nagilin, nagrimat
nangted iti indayon agdama.
kaduaentay kailian nga agdir-i,
nagilin ti pinili a puli.
*rdo. padre gregorio aglipay, taga batac,
dinutokan ni emilio eguinaldo a bikar heneral
ti rebolusion idi gubat filipino ken amerikano
idi agtapog ti siglo 1900.
2
nangngegmo met, atanud, aweng 'diay
tangguyobda? naiduma a rambak
'toy a kasangay, ay! napno't ragsak:
aginnatkan, intay makidar-ay.
sangagasuten* ti pinili, ti
pagilian a napnuan ti parmata,
kenkuana adda pay sudit' sirmata,
pagilian ti maingel a puli.
maingel man ni ipinili ngem
adda kenkuana 'tay urbanidad,
itangtangsitna ti poon, pati
gapuanan a gubuayan 'tay raem.
ugalina di a gumarugad,
kinapakumbabana adda't sipi.
*nadanon ti ili a pinili ti maika-100
a tawen ti pannakapundarna idi enero
1, 2020.
