Dangla laeng, dimo kuna. Ti agas a magatgatang kadagiti botika naparnuay manipud kadagiti bulong ti dangla (lagundi) ti maysa kadagiti irekrekomendar ita ti Department of Science and Technology (DOST) a nayon dagiti mainum no adda dagiti marikrikna a sintoma ti COVID-19 virus.No la ketdi suroten ti dosis, manamnama a maagasannaka ti Lagundi, kas kuna ni Dr. Cecilia Maramba-Lazarte, project leader ti naisayangkat a Lagundi clinical trials.Maibasar iti resulta ti Lagundi clinical trials nga inwayat ti University of the Philippines-Manila (UPM) babaen ti suporta ti Department of Science and Technology-Philippine Council for Health Research and Development (DOST-PCHRD), mabalin nga uminum dagiti pasiente nga addaan “mild” laeng nga impeksion ti COVID-19 virus iti syrup wenno tableta a Lagundi iti mamitlo iti kada aldaw iti 10 nga aldaw tapno sumayaat ti riknada.Para kadagiti nataengan a pasiente, mabalinda ti agtomar iti 600mg a tableta wenno uminum iti 5ml iti 600ml a syrup, mamitlo iti kada aldaw.Para kadagiti ubbing, agbaliw ti dosis agbatay iti tawenda.Mabalin nga inumen ti 300ml a syrup iti mamitlo iti kada aldaw ngem 2.5ml agingga iti 5ml laeng kadagiti edad 2-4; 5mL kadagiti edad 4-6, ken 7.5 agingga 10mL kadagiti edad 6-12. Kadagiti met tin-edier nga agtawen iti 12 agpangato, mabalin ti 600mg a tableta iti mamitlo iti kada aldaw.No masurot daytoy, bumaba dagiti sintoma ti COVID-19 virus aglalo ti isusubli ti panagangot dagiti pasiente. Nupay kasta, agannad laeng iti panaginum iti Lagundi a syrup wenno tableta nupay magatang daytoy a kas over-the-counter medicine tapno saan a masobraan wenno saan a ma-overdose.Ken agtultuloy koma latta ti panagpakonsultar dagiti pasiente iti doktor tapno mamonitor dagiti vital signs.“Inadal a nalaing ti grupomi ti Lagundi syrup ken tableta gapu ta kayatmi ti makatulong tapno mapaksiat ti COVID-19," kinuna pay ni Dr. Maramba-Lazarte.Naaramid ti pormula babaen ti National Integrated Research Program on Medicinal Plants (NIRPROMP), inaprobaran ti Food and Drug Authority (FDA) ti Lagundi a kas agas ti uyek ken asthma.
