SIUDAD TI LAOAG – Inyam-ammo itay arinunos ti Disiembre ti Department of Tourism-Ilocos (DOT Region 1) ti sangapulo ket dua (12) a desdes ti bisikleta iti probinsia ti Ilocos Norte saan laeng a tapno mapadur-as ti lokal nga ekonomia no di pay ket tapno mapasubli dagiti umili ti panagtalekda a rummuar iti daytoy baro a normal.

Segun ken ni Evangeline Dadat, hepe ti turismo ti DOT Region 1, a paset laeng daytoy sangapulo ket dua (12) a ruta ti bisikleta kadagiti nadumaduma a desdes iti nakaparsuaan iti probinsia nga inarisit ken binalidar ti DOT manipud idi Oktubre agingga idi Nobiembre.

Karaman ditoy ti desdes ti Kamadmadrian iti Currimao, desdes ti Catuguing iti San Nicolas, desdes ti Nabu iti Batac City, salogan ti Lagui iti Laoag, dana ti bisikleta iti Solsona-Apayao, ruta ti bisikleta ti Badoc Virgen Milagrosa, dana ti bisikleta ti Paoay Lake, salogan ti Sapat iti Pasuquin, desdes ti Payak iti  Pasuquin-Burgos-Bangui, desdes ti Stingray iti Pagudpud, desdes ti Salsalamagui iti Vintar ken ti dana ti bisikleta iti Karingking Serrek iti Solsona a nakayalnagan ti programa iti turismo iti bisikleta. 

Kuna ni Alex Peralta a maysa a bike tourism consultant ken paset ti DOT assessment team nga adu dagiti naisangsangayan a desdes ti bisikleta iti Ilocos Norte tapno mairusat dagiti aktibidad iti turismo ken tapno matignay dagiti umili a sakayanda manen dagiti bisikletada ket nanamenda kinapintas dagiti buya iti ruar dagiti pagtaenganda.

Indauluan ni Governor Matthew Joseph Manotoc dagiti siklista a nangpadas iti desdes ti Karingking Serrek.

Iti ababa a bitla daytoy, linugayan ni Manotoc ti DOT iti panangyam-ammoda kadagiti baro a pagawis a kas iti panagbisikleta para iti turismo nangruna ta immadu dagiti siklista bayat ti pandemia.

Nadakamat ketdi ti gobernador a sakbay pay ti pandemia, rinugrugianen daytoy nga itandudo ti panagbisikleta idi 2019 a saan laeng a mangpabiag ti turismo no di ket kaswagas ti transportasion.

Iti kumarkaro a traffic iti Laoag, kas pagarigan, nadakamat ni Manotoc a mabalin nga alternatibo a wagas ti transportasion ti panagbisikleta.

Kuna ni Manotoc a maragsakan ta opisial a nayalnagen ti turismo iti bisikleta a mabalin a pangbiag iti turismo nangruna iti Solsona ken kadagiti akindaya nga ili ti probinsia nga addaan iti nakadakdakkel a potensial iti panagdur-as gapu iti turismo.

Dinakamat pay daytoy a saanen a dawaten ti probinsia ti pannaka-test dagiti bisita no la ketdi kompleto ti bakuna dagitoy.

(Naadaw iti Philippine News Agency ken naipablaak iti Bannawag, Enero 16-31, 2022 a bilang.)