Dua a Daniw ni HONOR BLANCO CABIE
1
napardas anniniwanna no 'tay
mapan iti simbaan a bassit,*
adda pegges daydiay panagtaray.
5 a Daniw
'diay kulitangtang ti orasion 'diay
simbaan dakkel apagbiit --
di maitudon dapan no agtaray.
uliendan ti agdan simbaan 'diay
adda 'ti kurba't ili -- 'tay billit
ti kampanario ta mabuakda 'diay.
tunggal malem ta salapi daytay
mateggedan ni 'tanudko -- sal-it
a biag, ngem nakaurnong naiburnay.
addan appo ni 'tanudko, ngem ay!
lagipna 'tay latta mangidukit
'tay anniniwan nga agtartaray.
napardas anniniwanna no 'tay
mapan isun simbaan a bassit,
adda pegges daydiay panagtaray --
agal-allin metten daydiay burnay
*awag iti simbaan nga aglipayano
wenno iglesia filipina independiente
iti paoay, ilocos norte; ti dakkel
a simbaan iti ili isu ti romano a simbaan ni san san agustin,
nairamanen a kas UN heritage lister.
2
guyodek siket init no daytay
ipannan a rikna 'diay laud ti
adu a balbalay ken 'diay baybay.
'ti laud callaguip ken suba 'diay
dalluyon no idin agat-ati
kingki ken korienten 'tay mangrayray.
agaponen manok ken dagitay
kawitan asidegen rabii
ta ulesannanton ti paoay, ay!
ay! ngem urayendat' orasion, 'tay
panangug-ugis man kadagiti
nataptapokan muging away 'diay.
iti poblasion paoay dagitay
aggayyem* dida a maipakpakini,
daydiay dakdakkel ta managtaray.
ar-arakupen dakdakkel daydiay
man siket init ta mapanen 'ti
labes 'diay suba, callaguip, baybay --
simbaan a bassit mapan sadiay.
*ni hbc agkulitangtang iti kampana ti
romano sa agtaray a mapan iti simbaan a
bassit; kaduana ni pacifico duque, tubo
ti puritac, pinili, ilocos norte, nagbasada
a dua iti paoay, ngem agnaed itan ti
maikadua iti telbang, bayambang,
pangasinan.
