Daniw ni EDDIE AGPALZA
Pinilitmo, O Biagko, nga insiray dagita matam
Tapno pilitem nga anninawam ‘toy innak pakabuklan
Kas iti kagudua nga agukrad dagita matam
Indasigka kas iti init nga agpakpakadan
Napintas a buya, ngem iti bara, awanan.
Pinetpetak dagita imam
5 a Daniw
Tapno ipariknak ti bara iti agkapkapuyen a namnama
Binalesmo a pinetpetan dagiti dakulapko
Tapno ipariknam a dimo kayat ti agpakada
Ngem dita man kayat
Ti aginnibbet, piliten a sumungad ti sipnget.
Inkidemmo dagita matam, O Biagko
A kinagiddan ti panagsaknap ti lidem ti rabii
A binuyogan metten ti adu a sangit ken saning-i
Ta ammomi a dikanton agsubli
Adu dagiti nasam-it a lagip
Ti napalabas, ngem dida kabaelan
A punasen ti liday nga inka imbati
Palubosandakan, O Biagko
Ta no ipalubos ti Dios Apo
Agkitatanto manen iti umisu a tiempo.
(Taga-Vintar, Ilocos Norte ken kameng ti Hunta Direktiba ti GUMIL Oahu ti autor a maysa a lisensiado nga electrical contractor ken agdama a presidente ti Vintar Ohana. Datonna daytoy a daniw iti kaingungotna, ni Gloria, a pimmusay iti sakit ti puso itay nabiit.)
