Aw-awisen ni Gobernador Matthew Marcos Manotoc ti Ilocos Norte ti pannakitinnulong ti sektor pribado wenno dagiti negosiante tapno mapadur-as pay ti agrikultura ken turismo iti probinsia.

Itay Pebrero 3, kinuna ni Gobernador Manotoc iti “Pandesal Forum” a sinangaili ti Kamuning Bakery Café, nga agiwaywayat ita ti Gobierno Probinsial ti Ilocos Norte  kadagiti addang tapno mapapigsa ti ekonomia ti probinsia a pinabuntog ti pandemia.

Kangrunaan a pakaiturongan dagiti addang ti panagproseso kadagiti produkto ken iti negosio iti agrikultura a saan laeng nga iti panagpaadu iti apit.

“Adda dagiti pagap-apitan ti Ilocos Norte nga agsobsobra met ti apit isu a nasken ti panagproseso kadagitoy nga apit. Ngem nasken ti mekanisasion, umno a panagproseso iti produkto, ken pannakailako dagitoy isu a nasken ti tulong dagiti baro nga agipupuonan wenno imbestor,” kinuna ti gobernador.

Mairaman kadagiti kangrunaan a produkto ti Ilocos Norte ti bawang, lasona, dragon  fruit, mangga, kamatis, ken dagiti makunkuna a high-value crops.

Dinakamat met ti gobernador ti dakkel a potensial ti turismo iti probinsia ket nasayaat unay no adda dagiti agipuonan para iti turismo a kas koma iti pannakapasayaat ti Badoc Island nga aglawa iti 36 nga ektaria. Masarakan ti Badoc Island, nga addaan iti puraw a kadaratan, maysa a kilometro iti laud ti ili ti Badoc.

“Kayatmi nga ilako ti isla iti maysa a luxury resort developer; daytay makapaitakder iti resort a ‘medyo high-end’ ken ‘tay di makadadael iti nakaparsuaan,” kinunana.

Mairaman kadagiti dadduma pay nga industria a kayatna a mapasayaat iti probinsia ti renewable energy, business process outsourcing ken information technology, ken  responsible mining.