Babai-Bannawag

Daniw iti Parparaangan ni CARMEN TIOAYA CASTILLO CID

Babai a napnuan sudi
Galadmo naisupsupadi
Pusaksakmo makabatombalani
Makaguyugoy pintasmo makagargari.

Babai, ‘ta dayawmo saluadam,
Adaywam naranggas a kulibangbang
Dayta hardinmo ket inka aywanan
Tapno sarmingmo dinto mamulitan.

Babai, gunaymo naganaygay unay
Pagwadanka koma kapatadam a naruay
Talugadingmo ap-apalanda pay
Bagnos ti arapaapko a dinto malaylay.

Babai, dayta rupam naumbi a lung-ay
Uray nakaridepak langam makamurmuray
Pasurot ni Ines Cannoyan idi punganay
Masalimetmetan koma dagita a saguday.

Babai, pagulidanka adu a kaputotan
Iwagasmo nalinteg a pagannurotan
Sikat’ paganninawan ken pagtuladan
Nasayaat nga aramid, pagtitinnawidan.

Babai