SIUDAD TI LAOAG – Nangilatang ti gobierno ti probinsia ti Ilocos Norte iti 65 a milion a pisos iti daytoy a tawen tapno matulongan dagiti agad-adal iti babaen ti napaiget a programa ti scholarship daytoy, a maidiaya itan iti innem a kategoria.

Manipud iti 45 a milion a pisos a badiet itay napan a tawen a nangyabaga iti 2,047 nga iskolar, ninayonan ti gobierno ti Ilocos Norte ti badiet itoy a tawen tapno maakomodar ti ad-adu pay nga interesado nga aplikante.

Itoy apagtapog ti tawen, inreport ni Dr. Danny Daquioag, daulo ti Provincial Education Office (PEO), a mangididiaya ti probinsia kadagiti scholarship grants kadagiti estudiante iti medisina, agrikultura ken panagpiskeria iti kolehio ken sekundaria, kadagiti estudiante iti arte, kalalaingam iti klase, kadagiti estudiante iti techvoc (technical and vocational) kasta met kadagiti kualipikado nga estudiante iti senior high school.

Iti presentasion daytoy iti maysa a presscon, kuna ni Daquioag a nupay ad-adu latta ti nailatang kadagiti nalalaing nga iskolar, ad-adu metten ti maididiaya para kadagiti estudiante iti agrikultura, panagpiskeria, ken iti arte.

Itay napan a tawen, nangyam-ammo ti gobierno ti Ilocos Norte iti tallo a baro nga scholarship programs a pakairamanan ti Doctor of Medicine nga adda 16 a naipaayan, kurso iti agrikultura ken panagpiskeria nga addaan iti 80 a benepisiario iti kolehio,ken 216 iti hayskul.

Kas nayonna, nakatulong met ti art scholarship program iti di nakurkurang ngem 222 nga iskolar itay 2021.

Iti biang ni Bokal Saul Paulo Lazo iti kapasidad daytoy a kas daulo ti komite iti edukasion iti Sangguniang Panlalawigan, kunana a mangnamnamada nga ad-adu pay ti matulongan nga iskolar babaen dagiti baro a kategoria ken dakdakkel nga stipend.

Innayon ni Lazo nga adda dagiti plano a mangidiaya iti sabali nga scholarship program a para kadagiti estudiante a mangala iti abogasia.

Kasta met a babaen ti 100 percent board passing rate dagiti iskolar iti medisina, manamnama ti ad-adu pay nga slot para kadagiti estudiante iti medisina tapno ad-adu pay nga Ilokano a doktor ti maguyugoy nga agserbi iti probinsia, nangruna ita tiempo ti pandemia. (LEILANIE G. ADRIANO)

(Naipablaak iti Pebrero 1-15, 2022 a bilang ti Bannawag.)