Agawaten ti Saniata Literary Awards (sigud a Saniata Prize) kadagiti entry para iti pasalipna iti daniw ken ababa a sarita (flash fiction). Daytoy ti maika-8 nga edision ti salip (narugian idi 2012) ken is-isponsoran ti Saniata Publications ken ti Pamilia Tabag.

Dagiti pagalagadan ti salip:

1. Naluktan ti salip idi Disiempre 31, 2021 ket agpatingga iti Hulio 22, 2021. Silulukat kadagiti amin a mannurat nga Ilokano malaksid kadagiti empleado ti Saniata Publications ken kadagiti kameng ti Pamilia Tabag.

2. Addaan ti salip iti dua a kategoria: Daniw ken Ababa a Sarita (flash fiction).

3. Iti kategoria a Daniw, buklen ti pakisalip iti lima a daniw. Saan a makedngan ti kaatiddog ti tunggal daniw.

4. Iti kategoria nga Ababa a Sarita, buklen ti lima gasut (500) wenno nakurkurang pay a balikas.

5. Maysa laeng a pakisalip iti tunggal kategoria ti mabalin nga ipatulod ti mannurat.

6. Masapul nga orihinal, di pay naipablaak, ken nakasurat iti lengguahe nga Ilokano wenno saan a naipatarus manipud iti sabali a lengguahe ti isalip a sinurat. No matakuatan a nabalusingsing daytoy a pagannurotan, maibabawi ti gunggona ket maparitanto metten a makisalip ti autor iti ania man a pasalip ti Saniata Literary Awards.

7. Masapul nga iti PDF file amin a pakisalip iti single space, Times New Roman a font ken 12 a rukod.

8. Masapul nga agusar iti nagan iti pluma (pen name) ti mannurat. Iraman ketdi iti email ti kompleto a nagan, numero iti selpon, ken adres ti pagtaengan wenno opisina.

9. Ipatulod babaen ti email ti pakisalip iti [email protected] iti Subject nga “8th Saniata Literary Awards: Ababa a Sarita” para iti ababa a sarita ken “8th Saniata Literary Awards: Daniw” para iti daniw. Kayatna a sawen, no makisalip iti agpada a kategoria, agduma a mensahe iti email ti panangidatag kadagitoy.

10. Dagiti premio para iti tunggal kategoria: 1st Prize: PhP2,500.00; 2nd Prize: PhP 2,000; 3rd Prize: PhP1,500.00.

11. Maipakaammo dagiti mangabak inton Oktubre 4, 2022 ken mapadayawan met dagitoy iti pasken nga iwayat ti Saniata Literary Awards inton Disiembre 31, 2022.

12. Makipagtagikua ti Saniata Prize kadagiti mangabak a daniw ket awan sungsungbatanna kadagiti mannurat no bilang usarenna dagitoy iti ania man a wagas a kas iti pannakaipabuya, pannakaipablaak iti magasin wenno libro, ken pannaipaskil iti social media. Agtalinaed ketdi ti copyright iti autor.

(Naipablaak iti Pebrero 1-15, 2022 a bilang ti Bannawag.)