Uppat a Daniw ni HONOR BLANCO CABIE
1
kuna ni manang addaan pait
tinempla a kapet' kadua't balay,
anian adda pay tumtumpaw, sal-it,
TURISMO: Intayon Idiay Ayuyang Garden iti Pila, Siudad ti Laoag!
awan man lat' rikna a maitag-ay.
bimmaaw pay ketdin, atanudko,
kape ni manang insaganana,
di makadengngep rusok, apo, o
amami, dispensaremon ida.
trabahona't balay awan pulos
panangyal-alikakana tapno
umisem met ni manang -- dos por dos
idapigda koma, atanudko.
koma saysayaatenna daydiay
templat' kape, daytay mangmurmuray
2
innaldaw a barbaragenda 'diay
anak ni apo a lakay, awan
pulos panagsarday, di inggaan
panagipuruakda, ay-ayda pay.
adu pay 'tay ibirbirakatda:
di agbaybayad buis, kano birkog,
adu pay 'tay inda idisdisnog,
saan kan’ a rumbeng tapayada.
pati pariok naglutuanna't pakbet
idi adda sinangailina
panangipuruakda kenkuana 'tay
napumpunno’t lati, kinaunget.
kas man awan umno nga aramidna --
kayatdan nga isu daytay matay.
3
kitaem, mang procopio, siam daydiay
inlabasda't balay da mang godo
idi kalman -- sennaay ken liday
a dinanggayan apo musiko.
maymaysa ti kolor sabsabongda,
agrirituno a korona 'ti
sidiran 'diay nakayuldaganda --
napandan bukodda a rabii.
nadlaw ni mang godo 'di timman-aw
adelfa, kalanutsi* nga addaan
tayengteng 'tay kaabay 'tay dung-aw:
labes bantay isudan 'tay napan.
nangitulod a musiko adda
'diay uniporme 'tay labbagana.
*adelfa (nerium oleader) derosas ti
kolorna; kalanutsi (plumeria rubra),
natayengteng met a derosas --
agpada a maar-aramat a kas korona
para kadagiti minatay iti deppaarna’t
amianan.
4
tumpaw panagdung-awda dagiti
naibati, naulila 'ti rabaw
daytoy daga, inda panagdung-aw
mapirsay langit ngato ti puli.
adda bulanos ti aruyotna
kadagiti nasawang a mata daydiay
mangiladawan 'diay panagliday,
mangsalsalugsog muging ken rikna.
