PANGASINAN — Aglatlatak ita ti maysa a mannursuro a makatulad iti 30 a timek dagiti nalalatak a personalidad ken karakter iti TV ken pelikula.
Impamatmat ni Sean Carambias, mannursuro iti Grade 3 ti Cherished Moments School iti Mangaldan, Pangasinan ken tubo ti Rosario, La Union, daytoy naidumduma a talentona iti video nga iny-upload ti nasao a pagadalan iti account daytoy iti Facebook.
Sumagmamano kadagiti timek a matuladna dagiti karakter a cartoon, Mobile Legends, ken uray ti sumagmamano kadagiti karakter iti pelikula a mairaman iti Harry Potter.
Naala ti bideo ni Carambias iti CMS Teacher’s Got Talent a pasalip iti anibersario ti pannakabangon ti nasao a pagadalan idi Oktubre 2021 a nakaipakitaan dagiti nadumaduma a talento ti nasao a mannursuro.
Manipud Kadagiti Agdama a Kameng ti Bannawag: Dios ti Agngina!
Ni Carambias ti nangyalat iti umuna a gunggona iti pasalip.
Nabiit pay nga iny-upload ti pagadalan ti bideo ken nag-viral iti social media.
