Daniw ni HONOR BLANCO CABIE
Laglagipem, tao, sika ket tapok ket iti tapok agsublikanto.*
--naadaw dagitoy a balikas manipud iti Genesis 3:19
1
Iti isasagpat Kuaresma dumteng gulingguling:**
Manipud Kadagiti Agdama a Kameng ti Bannawag: Dios ti Agngina!
Kannawidan pagriritunuan sayaat ken talugading,
Daytoy a gameng inna iti pagaaduan ipasimudaag
Napasnek a pammati iti Ama mangisagut ti saluad.
2
Panangawat senial ti Krus iti muging ni i-Paoay
Adda inna ipamatmat biag a makaited murmuray,
Iti gulingguling ni addaan pammati di mayaw-awan,
Adda sarukodna a nabisked iti inna pagpagnaan.
3
Adda yarasaas daytoy gulingguling: Pannakasaluad
Dagiti annak ti Apo tapno saandanto a bumaliktad,
Adda't kurus ti Krus iti muging ni napasnek pammatina
Iti daytoy a kannawidan sangalubongan masalbarda.
4
Kadagiti kalkalsada, addaan wasnay a pagpagnaan
Maisarming napasnek a pammati ni i-Amianan,
Gapu't kari iti pannakasalbar daydiay ragsakda
Maanninawan iti makaguyugoy nalamuyot a salada.
5
Iti agdama adun a simbaan, adun a pammati
'Tay mangar-arakup mangtaptapaya iti kari
Nga adda karbengan a sumrek iti kastilio ti Ama
Dagitay addaaan pegges panagbabawi't basbasolda.
6
Iti yarasaas ti padi – tapokka ket iti tapok agsublika –
Dagiti addaan panagbabawi, addaan panagpakumbaba
Maanaraaran awan patingganat' sayaat a panagbiag,
Dagitay managugis awan kadakuada 'tay kinasalbag.
7
Iti Daan a Testamento ni Job panagbabawina napasnek,
Iti kinapakumbaba naipaiggem kenkuana ti tulbek,
Kas met nailanad iti Samuel, Isaias ken Jeremiah
Daytay tulbek manglukat iti siled natalinaay nga inana.
8
Metodista, Episcopal, Aglipayano wenno Katoliko,
Naimolden 'toy kannawidan kadagiti parsua ti Apo,
Kannawidan mangisagut iti naisangsangayan a kari:
Kannawidan dagiti umili, i-Paoay man wenno i-Pinili.
9
Gulingguling naggamuten iti lungog ti kannawidan
Tinnawen nga iduyduyakyak dagiti agkakailian,
Addaan kinapakumbaba't pammatida kas ken Abraham:
Ti ipapanaw bigat man, aldaw, malem wenno sardam.
10
Iti ganaygay dagiti agsasala iti wasnay ti kalsada
Ipamatmatda a ti patay, iti Apo, adda patinggana,
Gapuna ragsak isalsalat' naragsak nga agkakailian,
Ragsak iti gulingguling gameng itan ti kannawidan.
*Memento, homo, quia pulvis es, et in pulverem reverteris.
Kadagiti dadduma a simbaan, daytoy ti ibaga ti Padi:
Paeniteat et credite evangelio.
(Agbabawika ket mamatika iti ebanghelio.)
**Ash Wednesday iti tawen 2022, Marso 2
