Tallopulo a sarita ti naawat para iti Salip iti Ababa a Sarita ti 6^th Mario Abinsay Albalos Foundation Literary Awards, saan ket a 29, kas impakaammo ti Secretariat ti Mario Abinsay Albalos Foundation Literary Awards (Albalos Awards).

Ti maika-30 a sarita, naipisok iti Spam, saan ket nga iti Inbox, a makaigapu iti di dagus a pannakakita ti Secretariat iti daytoy nga entry.

Dagiti 30 a sarita a naisalip:

Sulisog; Arapaapka, Doktor; Beinte; Tawid; Gawat;

Agas; Ni Amangko ken Siak; Plasa; Ti Balay ti Padi; Ama;

Angelus; Pannubok; Surat; Tawid ti Kaputotan; Ti Salip;

Ti Mensahe; Abut; Lalat; Ti Balud; Dulon;

Ungik; Inton Agsaraktta Manen; Arapaap; Running Lights; Dagiti Babato ni Lam-ang;

Sangol; Dagiti Bagtit iti Ili ti Calabigan; Panagpullo; Head Labor; ken Ni Douglas.

Nayawaten kadagiti kameng ti hurado dagiti naisalip a sarita.

Nabangon ti M.A. Albalos Foundation Literary Awards (Albalos Awards) a kas pangtaginayon iti lagip daydi Dios-ti-aluadna a mannurat ti Bannawag Mario A. Albalos, tubo ti Cabaroan Daya, Siudad ti Vigan, napadayawan a Pedro Bukaneg awardee ken umuna a Thomas Jefferson awardee ti Estado ti Hawaii a nagnanaedanna agingga iti ipupusayna idi Marso 3, 1991 iti edadna a 40.

Isponsoran ni Jenny R. Alcausin (agnanaed iti California) ti pasalip ti foundation ken agpaay met a mangimaton iti nasao a pasalip da Jun Abinsay ken Priscilla Dela Cruz (agnanaed iti Hawaii) iti pannakitinnulong dagiti kameng ti Bannawag.

Narugian ti salip idi Oktubre 30, 2021 (anibersario ti pannakayanak ni Mario A. Albalos) ken nagpatingga iti Marso 3, 2022 (anibersario ti ipupusayna).

Naluktan ti salip kadagiti amin a mannurat iti Ilokano malaksid kadagiti mangimaton ken asideg a kakabagianda, ken kadagiti kameng ti Bannawag.

Daytoy met ti umuna a gundaway nga agpasalip ti Albalos Awards iti Ababa a Sarita (Flash Fiction).

Dagiti gunggona: Umuna a Gunggona, PHP10,000.00; Maikadua, PHP8,500.00; Maikatlo, PHP7,000.00; Maikapat, PHP5,000.000; ken Maikalima, PHP3,000.00.

Maipaayan pay dagiti mangabak iti sertipiko ti pammadayaw malaksid iti medalion a maited iti mangyalat iti Umuna a Gunggona.

Adda met karbengan dagiti hurado a mangkissay iti bilang dagiti mangabak no awan ti makapatar iti bukodda a pagbatayan dagiti mangabak. Mabalinda met ti mangparnuay iti nayon wenno sabali a gunggona, no kasapulan.

Mapakaammuanto dagiti mangabak no kaano ken no sadino a maangay ti seremonia ti pammadayaw. --O