Ni ELISEO B. CONTILLO
Kabkablaawan ni Bise Mayor Pablito Sanidad dagiti agad-adal iti Narvacan National Central High School (NNCHS) a nangyalat iti 6 a medalia iti kaiwaywayat a 23rd International Robot Olympiad a naangay iti South Korea.

Innem a medalia ti naipaay kadagiti agad-adal iti Narvacan National Central High School (NNCHS) iti pannakisalipda iti 23rd International Robot Olympiad 2021 a naangay iti South Korea.

Nagun-od ti Team Narvacan DPC iti kategoria a “Robot in Movie” ti dua a silver medal. Kameng ditoy da Rose Marie de Peralta, ken Aleckhein Cabasa ken nagpaayan a coach ni Roxanne Rimbaoa.

Nagun-od met ti  Team  Narvacan BE  ti dua a bronze medal para iti Creative Category. Kameng ditoy da Mark Jason Infanta Bocaling, ken Ike Freniel W. Enomis, ken nagpaayan a coach ni Vince Clyde DP Cardenas.

Nagun-od pay ti Team CCA ti dua a Technical Award iti Creative Category met laeng. Kameng ditoy da Sandara Rose Callejo ken Christian Campanilla. Nagpaay a coach ni Eduardo C. Cuartelon.

Personal a kinablaawan ni Bise Mayor Pablito Sanidad dagiti kameng ti grupo iti panag-courtesy call-da kenkuana itay Marso 14 a nangiparanganda kenkuana kadagiti inaramidda a  robot nga impangabakda iti olimpiada, ken no ania ti pakaaramatan dagitoy a kas iti panangited iti agas, panag-disinfect, panangasistir kadagiti parokiano, ken dadduma pay nga aramid.

Kinuyog ida ni Mr. Emilio Ayson, Principal IV ti NNCHS, kaduana da Mrs. Madelyn Enomis, Assistant Principal; Dr. Lubeth Cabatu,  Vince Clde Cardenas ken Roxanne Rimbaoa, agpada a coach.  

Nasurok a 500 ti nakisalisal iti robotics olympiad a nagrimatan ti kabaelan ti Narvacan delegation.

Nagpaay a consultants da Dr. Cabatu, STEM Subject Group Head; Mrs. Enomis, Assistant Principal II ti SHS; ken Mr. Ayson, Principal IV ti NNCHS.

Iti panagsarita ni Bise Mayor Sanidad, kinunana a sipapannakkel ti LGU Narvacan iti panangidaulo ni Mayor Luis "Chavit" Singson iti nagun-odda a pammadayaw gapu ta intandudoda saan laeng a ti NNCHS, ti ili a Narvacan, no di pay ket ti sibubukel a pagilian.

Inkari pay ni Bise Mayor Sanidad ti agtultuloy a suporta ti gobierno lokal ti Narvacan kadakuada kadagiti sumarsaruno pay nga igannuat ken pakisalisalanda.

Mabigbig iti sirkulo ti edukasion ken siensia dagiti agad-adal iti NNCHS a nalatak a kas "Home of the Champions"  ta mairaman pay kadagiti inyalat dagiti dadduma pay a grupo dagiti agad-adal ti pammadayaw ti STEM Wizards iti Philippine Science High School, Ilocos Region Campus ken nakagun-odanda iti umuna a puesto iti provincial level ken 1st place met laeng iti regional level nga imbagian da Sandara Rose Callejo, Jenny Marie Carta, ken Joanna Marie de Leon, ken coach ni Mark Christopher Molina.

Iti met Creotech National Coding Competition, nag-finalist (Top 5 iti 50 a nagsasalisal) da Justin Guile B. Baldo ken John Paul Atendido, ken nagpaayan a coach ni Reinnier Dameg ken  nakapadayawanna a Best Coach.

Iti met UP Namnama 40th Sirib & 13th Saririt, para iti Short Film Making, nagun-odda ti maika-2 a puesto iti insalipda a Documentary a napauluan iti "Tag-ay" ken nagkamengan da Justin Guile B. Baldo (direktor), Rose Marie M. de Peralta, Ian Benedix B. Bosque, ken Joshua Cabasa. Nagpaay ditoy a coach ni Vince Clyde D. Cardenas.

National qualifier-da pay iti UP Patalasan Lahi 2022.