Uppat a Daniw ni HONOR BLANCO CABIE
1
iti maseknan 'tay sainnek, 'tay
ladingit no adda pumusay ta
keltayenna daytay ganaygay, ay!
TURISMO: Intayon Idiay Ayuyang Garden iti Pila, Siudad ti Laoag!
ta barrenaenna dayta rikna.
no 'diay pumanaw ta adda daytay
kinasinged, adda imbatina,
daytay pakaigapuan ti murmuray,
ay! la ketdi adda bulanos lua.
saan man a masirpat lua iti
pagtitiponan, 'ti pagu'mmongan,
adda magudas muging rabii,
kas man adda pannakayaw-awan.
panunot ta maletletan no 'tay
bagi mapan ballasiw 'diay bantay.
2
ania man a makaited sina ta
adda giwang nga aramidenna't
panagdaliasat 'toy a biag, aplat
daytay ipalkatna 'ti karkarma.
no nasursuron nga ipatpateg,
saan man a mapan ballasiw 'diay
bantay, ay! ngem awanen 'tay kidday,
rikna metten daytay maimammameg.
asino man ida a nangyalat
iti panagayat, panagraem,
'ti ipapanawda salugsog 'tay
umuk-ukuok la ketdi't urat.
daytat' saem nga addaan tadem,
saem, daytay bandos panagliday.
3
no ruot makadaniw abayna
daydiay panteon, ania ketdi ngatan
ragsak daydiay pimmanaw, inana
natalingenngen padana awan.
kadagiti aldaw ken rabii
awan ressat panangallingagna
no arasaas man wenno dir-i
isut' maipalpalladaw sibayna.
pammatik nga addaan ti ragragsak
isuda nga addan labes bantay,
awanen kadakuada 'tay amak
addan 'ti sikigan talinaay.
'namnama diyo nga ik-ikkaten,
nanubbot ta sumangpetto metten.'
4
uppat* kadagiti kakabsatko
ti nakakita 'ti asuk gubat,
labes uppat adda pay manongko
a dua** ngem didan nasaksian bettak.
siak a kaudianda, saanko man
narikna ti karigatna ti biag
idi libung-libong, atanud, 'nian
'toy padasko mangsukit 'tay lawag.
pandemia, 'tanud, nga addaan rungsot
daytoy sagsagabaek agdama,
salugsog biag dita, pati kuddot
mangal-alap-ap muging ken rikna.
'diay bayrus a kalaban ta awan
pay rupana iti pagaaduan.
*abc, wvbc, ebc, fbc.
**arbc, mbc.
