Uppat a Daniw ni HONOR BLANCO CABIE
1
iti immun-una a panawen
impalpaltiingmo kadagiti
propeta amin a kayat, ramen
TURISMO: Intayon Idiay Ayuyang Garden iti Pila, Siudad ti Laoag!
ragsak yetnagda't amin a puli.
ngem immuong lattat' panaglabes,
panaglabsing inyulog a kayat,
ama, nakitam amin a dangkes,
'ti addaan imbag awan piltak.
iti dadduma a gundaway ta
rinebbam sodom ken gomorrah, ay!
adun 'tay nakalipat 'ti ama,
sika a nangkiltay panagliday.
'ti nagan dagiti parsuam, ama,
pammakawanmo ta yetnag koma.
2
idi simreken ni jesus sadiay
jerusalem ta simmaraboda
tattao – 'tay aldaw nga umuna:
domingo ramos a puon rayray.
ubbing ken lallakay pati payen
'tay babbalasang ken 'tay babbaket
naragsakda awan ruprupanget
bulong niog iwagayway ti pangen.
ditan a mairingpas daytay kari
ni mateo a propeta a sumrek
jerusalem -- adda pakumbaba*
tapnon inna nga ispalen puli.
adda't iseserrekna 'tay tulbek,
'tay manglukat 'diay ruangan ti ama.
*nakasakay iti asno
3
mayat ti annukoyan dagiti
appo a musiko* 'ti libut 'diay
naturod a pinili ilimi:
tallo a libut addaan wasnay.
maysa't aglipayano, maikadua
'tay independiente, sabali pay
romano – 'tanud, 'diay panagdekket
tattao ta lawag adda sadiay.
ta agasem man kaaduna ti
kandela a mangted panaglawag,
adda sipngetna't dalan rabii –
da i-pinili, wen, dayta 'tay biag.
kasla mabriat ti langit batogmi
no libuten umanges rabii.
*tiger boys ti agasistir iti libut
dagiti aglipayano; troubadors met
ti agtokar iti iglesia filipina independiente;
dagiti taga-kimmampana/cabaroan met
'diay romano.
4
'ti panagallangogan 'diay pukkaw*
ni apo a jesus nga adda 'ti krus
impangngegna nga adda ama a dios
mangiridis ania man nga aliaw.
dakkel daydiay iparangarangna:
asino man nga addaan talek
iti ama saibbek maparmek
maingatonto sadiay pagarianna.
iti karruba 'diay simbaan ta
dumdumngeg met ni nana a baket
‘ti daydiay balikas maikapito
getta ti niog daytay singlagenna.
kadawyan nga adda iti petpet
adu a prasko 'tay mapumpunno.
*ama, kenka italekko 'toy espirituk
(lucas 23:46)
