Nobela ni Norberto D. Bumanglag, Jr.
MAAR-ARAKATTOT da Agent Donotelli ken Agent Rojas iti kellaat nga ipapanaw da John iti parke. Padpadasenda a kontaken ida ngem awan ti sumungbat nupay mangngegda ti anges dagiti dua ken ti napigsa nga ungor ti van nga agtartaray.
“All unit... all unit, mother goose has left the nest. Advise to follow, over,” inradio ni Agent Rojas.
Nagrasaw ni Agent Donoteli. “What the heck just happened?”
“Don't know... ngem no kunada a maitarayandatayo, nagbiddutda. Darasem a suroten ida. Shit, no mapukawko ti kuarta, I'm toasted,” indayamudom ni Agent Rojas sa nalagipna ti pangta ti boss-na no mapukawna ti kuarta.
Galiera Queen (MAUDI A PASET)
Sarsarunuen dagiti dua nga agent ti dua a saan a namarkaan a lugan dagiti pannakabagi ti linteg. Umad-adayo ti nagbaetanda iti van da John.
“Eagle in the sky... eagle in the sky… this is Alpha Romeo One, can yo hear me, over?” inradio ni Agent Donoteli.
“Loud and clear, Alpha Romeo One...” insungbat dagiti adda iti helikopter a mangsipsiput kadakuada.
Pagam-ammuan la ta adda gimluong iti sangoda. Ti immuna a saan a namarkaan a lugan! Nagiwes-iwes iti ibebettekna ken linamuten ti apuy.
Kellaat a nagpreno ni Agent Rojas. Nagsaw-ang ti luganda a nagpuligos iti 90 degrees iti panagsardengna sa pagammuan ta nariknada ti pannakadungparda iti likud. Naidugmam ni Agent Rojas iti manibela. Ngem nalagipna ti agidurduron iti kariton. Isu laeng ti nakaasideg kadagiti luganda.
“Shit!” inrasaw ni Agent Rojas idinto a dinandanogna ti manibela. Impayatna ti siliniador. Naggunay ti lugan. Dua a naka-bulletproof vest nga agpilpilay ti rimmuar iti bimtak a lugan.
Kinita ni Agent Rojas ti masanguananda. Awanen ti puraw a van.
“Eagle in the sky, this is Alpha Romeo One again. Do you have visual on the mother goose?”
“Negative, Alpha Romeo One. Negative,” insungbat ti helikopter iti ngato.
“Nalpastayon!” inridis manen ni Agent Rojas.
“Calm down, dude, sarakenta ida. Calm down,” kinuna ni Agent Donoteli.
“Nalaka a maibagam dayta ta saan a sika ti nakaitalkan ti kinse a milion a doliar. Iti ania man a wagas, nasken a masapulanta da John ket ti kuarta.”
SINUROT da Sgt. Ramirez ken Sgt. Cortez ti tallo a nangisit nga SUV apaman a rimmuar ti komboy ni Gaspar Medalla iti Safe House #3. Ninamnama dagiti dua a sarhento nga ibati ti lakay da Mrs. Villa ken Sandra ngem inkuyogda ida. Ad-addan a nagbalin a komplikado ti rescue mission-da.
Duapulon a minuto ti naannad a panangsursurotda iti komboy. Saanda nga ammo ti pagturonganda. Maymaysa laeng ti masiguradoda. Saanda nga agturong iti Lorenzi Park a kas nagtulagan da John ken Gaspar Medalla. Manipud iti Charleston Boulevard, nagpakanawanda iti Martin Luther King Boulevard. Nagsikkoda iti kalsada iti sirok ti I-15 freeway. Sinurotda ti Wester Avenue agingga a simmalpotda iti Industrial Road. Linabsanda ti Circus Circus Hotel and Casino. Naginayadda idi makitada a sumrek ti komboy ni Gaspar Medalla iti dakkel a rurog a pasdek.
“Fontainebleau,” nayesngaw ni Sgt. Cortez.
Nagkinnita dagiti dua. Agpadada a masmasdaaw.
Linabsanda ti ruangan ti dakkel a pasdek bayat ti iseserrek ti tallo a nangisit nga SUV. Adda nagtagiarmas a guardia iti ruangan. Nagsardengda iti sumaruno a pagsikkuan.
Iti tangatang, mangngegda ti dumanarudor a helikopter iti saan unay nga adayo kadakuada. Nakalawlawag ti spotlight nga aggapu iti helikopter.
Dimsaag dagiti dua iti luganda. Bitbit ni Sgt. Ramirez ti bag a naglaon iti M-4. Barut nga alad laeng ti naipalawlaw iti dakkel a pasdek. Inruar ni Sgt. Cortez ti night vision a largabista. Siniripna ti aglawlaw ti inaladan ken ti pasdek. Sumagmamano a nagtagiarmas ti agpagnapagna iti uneg ti inaladan ken iti ngato ti pasdek.
“Well guarded,” kinuna ni Sgt. Cortez.
Nagpusipos dagiti dua a nagsadag iti dakkel a poste.
“Marigatanta a sumrek,” insennaay ni Sgt. Ramirez. “Aduda unay.”
“Ngem nasken a sumrekta.”
“I know,” kinuna ni Sgt. Ramirez.
Madamdama bassit, nakitada ti puraw a van a sumsumrek iti inaladan.
“Da John ken koronel dagitan,” kinuna ni Sgt. Cortez. Liningayda ti nawatiwat nga Industrial Road ngem awan ti makitada a sumarsaruno a lugan dagiti pannakabagi ti linteg.
“Something is not right,” kinuna ni Sgt. Ramirez. “Masapul a sumrektan. Agpeggad da John ken...”
Saan a natuloy ni Sgt. Ramirez ti ibagana koma ta kellaat a nagsardeng ti maysa a nangisit a Chevy Suburban iti sangoda. Sipapardas nga inasut dagiti dua dagiti paltogda.
Naggiddan a nailukat ti sango ken likud a ridaw ti SUV. Nalasin a dagus ni Sgt. Ramirez ti maysa. Ti badigard ni Don Armando Geoleti.
Immasideg ti kadaklanda a dimsaaag manipud iti sango. “Siak ni Marco, no matandaanandak pay,” kinunana a nakialamano kadagiti dua. “Imbaonnakami ni Don Geoleti. Kasapulanyo ti tulong. Duduakayo. Saanyo a kabaelan ti puersa ni Gaspar Medalla.”
“Thank you, Marco. Ngem kasano nga ammoyo nga...?”
“Nabayagen a sursurotendakayo. Manipud pay iti safehouse ni Gaspar Medalla. Binilinnakami ni Don Geoleti a sililimed laeng a suroten ken tumulongkami kadakayo… gapu iti panagkitakit ni John nga umawat iti tulong ni Don Geoleti. Ta imposible nga adda labanyo ken ni Gaspar Medalla. Bale uppatkayo laeng.”
“Thank you manen,” kinuna ni Sgt. Cortez. “Mano ti taom?”
“Sangapulo.”
“Ania pay la ngarud ti ur-urayentayo? Agpeggad ti biag da John iti uneg. Let's go,” kinuna ni Sgt. Ramirez.
NAINAYAD ti panagmaneho ni John iti iseserrekna iti rurog a pasdek ti Fontainebleau. Ipalpalawlawna ti panagkitana. Malaksid laeng iti guardia iti ruangan, awan ti makitana a sabali pay a nagtagiarmas a tao ni Gaspar Medalla. Inturongna ti van iti masilawan ti dakkel nga spotlight. Ngem bayat ti yaasidegda iti silaw, rumaniag a rumaniag ti silaw ket napurarda. Marigatandan a makakita iti sanguananda iti raniag ti spotlight.
“Stop! Husto daytan a kaasidegmo!” Nabangag ti pukkaw ni Gaspar Medalla a nagbilin.
Insardeng ni John ti van. Iniddepna ti makina ti lugan. Ngem saan a nagkuti. Agur-uray iti instruksion ni Gaspar Medalla.
“Lukatam ti van. Ken agin-inayadka a dumsaag,” imbilin manen ni Gaspar Medalla.
“Kayatko a makita ti inak agraman ti kaduana sakbay a dumsaagkami, Señor Medalla!” impukkaw ni John idinto a kinitana ti remote control a nakaparabaw iti sangona.
Nagkatawa ni Gaspar Medalla. Napigsa. “Awan ti karbengam nga agkiddaw, John. Napalawlawanka. Saankan a makaruar iti daytoy a lugar.”
“Nagbiddutka, señor. Adda pay laeng kaniak ti sangapulo ket lima a milion a doliarmo. Mabalinko ti pumanaw ditoy. Dimonton makita ti kuartam.”
Naggarakgak ti lakay. “Patayek ti inam.”
“Mamatiak, señor. Ngem saanmo met a mapasubli ti kuartam. Kayatko a makita ti inak... a sibibiag,” impapapilit ni John.
Nakapungtot ti lakay. Innalana ti paltog ti kaab-abayna a badigardna. Sinirigna ni Col. Davis sa kinalbitna ti gatilio. Nagbalandra laeng ti bala iti sarming ti van. Naklaat ni Gaspar Medalla.
“Kas makitam, deñor. Bulletproof daytoy a van.” Pinagandar ni John ti lugan. “Makitak ti inak ken ni Sandra wenno pumanawkami ditoy?” inyikkis ni John.
Naiddep ti spotlight. Nalawagen a makita ni John ti sibubukel a lugar. Sangapulo ngata a nagtagiarmas ti nanglawlaw ken ni Gaspar Medalla. Nakaasutda amin iti paltog. Iti saan unay nga adayo kadakuada, adda nakaparada a bassit a lugan. Linasinna. Amarilio a Scion xB.
“Señor Medalla, do I have a deal or not?”
Sineniasan ti lakay dagiti taona. Nailukat ti maysa kadagiti nangisit nga SUV. Rimmuar ni Mrs. Villa ken ni Sandra.
“John!” inyikkis ni Mrs. Villa. Sumagmamano a paltog ti nakaipaturong iti inana.
“Okay, John... Iddepem ti makina ti lugan. Agin-inayadkayo a dumsaag ken Koronel Davis. Laglagipem, bassit laeng a panagbiddut, mataykayo amin,” imbilin ni Gaspar Medalla.
Iniddep met laeng ni John ti lugan. Pinidutna ti remote control. Inin-inayadna nga inlukat ti ridaw ti lugan. Apagbaba ti kanigid a sakana, intayagna ti kanigid nga imana.
“Señor Medalla, makitam ti ig-iggamak a remote control? Nakaptan daytoy a van iti bomba a makaanay a mangdadael iti sibubukel a rurog a pasdek. No dangram ti maysa kadakami, mairamanka ken dagiti taom nga agturong iti impierno, agraman ti kuartam.”
Apagapaman a napaulimek ni Gaspar Medalla.
Nagturong ni Col. Davis iti abay ni John. Agpadpadada a nakaiggem iti putan ti paltogda a nakasalikad iti siketda. Nagsanudda nga immadayo iti van.
“When the hell did you put a bomb in those boxes?” nakapuy ti timek ti koronel a nagsaludsod.
“Just a trick. Ngem dina ammo dayta,” insungbat ni John sa nagbaw-ing ken ni Gaspar Medalla. “Señor Medalla, palubosam ti inak ken ni Sandra nga umay iti ‘yanmi,” imbilin ni John
“Agent Donoteli, proceed to Fontainebleau. Repeat, proceed to Fontainebleau,” inyarasaas ni Col. Davis iti radio.
Nagkarasakas ti radio iti lapayagda. “On our way. Over.” Ni Agent Donoteli. Nangngeg da John ken Col. Davies ti napigsa a panagungor ti lugan.
Sineniasan ti lakay dagiti taona a palubosanda dagiti babbai.
“Dimo isina ti panagkitam ken ni Gaspar Medalla,” inyarasaas ni Koronel Davis ken ni John. “Siak ti makaammo iti inam ken ni Sandra. Clear?”
Nagsenias manen ti lakay kadagiti taona iti nakaparking a Scion xB. Nagandar ti lugan. Napigsa ti ungorna, kasla na-revise ti makinana. Nagsardeng ti lugan iti likud ti van. Napardas dagiti tao ni Gaspar Medalla a nanglukat ken nangbunag kadagiti nakakarton a kuarta a nayalis iti Scion xB.
“John, anak,” nagikkis manen ni Mrs. Villa. Agsangsangit.
“Agin-inayadka laeng, Mom... Saanka a madanagan. Everything is gonna be okay. Just keep walking,” imbalakad ni John.
Naikargadan dagiti kuarta iti Scion xB. Simrek ti driver. Nagungor a simiag a nagturong iti ‘yan ni Gaspar Medalla. Naganit-it nga immasuk ti goma ti lugan a nagsardeng iti sango ti lakay. Naigiddan iti dayta ti nagsasaruno a kanalbuong.
Narikna ni John ti nagsasaruno a bala a mayat a mangsari iti barukongna.
Nagtaray nga imkis ni Mrs. Medalla.
Naiddep dagiti silaw. Naabungotanen iti sipnget ti uneg ti rurog a pasdek malaksid laeng iti anaraar ti silaw kadagiti pasdek iti asideg ken dagiti apuy a naipugso kadagiti murdong dagiti kumanalbuong a paltog.
Nagtaray ni Col. Davis a nanggammat ken ni Mrs. Villa agraman ken ni Sandra. Ginuyodna ida nga impideg iti poste.
Nagsasaruno manen dagiti bala a nangarabas iti barukong ni John. Ngem saan a natumba. Ngem mariknana ti sakitna. Madamdama pay, natumban. Ngem pumalpaltog latta.
Agik-ikkis latta ni Mrs. Villa. Kayatna ti rumkuas iti pannakakitana ken ni John a natumba. Kayatna nga arayaten ti anakna. Ngem inggawid nga inkul-ob ni Col. Davis.
“No, Misis Villa. Please stay...” impakpakaasi ti koronel. Nakangngeg iti karasakas. Timmaliaw ngem naladawen. Napigsa ti kanalbuong a naibuang. Napuntaan ti takiagna. Maysa pay a kanalbuong. Napuntaan ti barukongna. Mariknanan ti ut-ot. Nabaliktad. Nakitana ti umas-asideg a lalaki. Sinirigna daytoy. Kinalbitna ti gatilio. Naminsan. Namindua. Namitlo. Nanabtuog a kasla nambaan ti lalaki.
Kasla agar-arapaap ti koronel. Nadlawna ti pannakaguyodna.
Rumanipak latta ti nagduduma nga igam. Nagsardengen ti panagpaltog da John ken ti koronel ngem adu latta ti mangpalpaltog kadakuada kadagiti tao ni Gaspar Medalla.
“Ramon!” inyikkis ni Gaspar Medalla.
Awan ti simmungbat. Rumanipak latta ti paltog.
“Ramon!” inyikkis manen ni Gaspar Medalla.
Asug ti nangngeg ti lakay. Nagturong iti naggapuan ti asug. Ni Ramon, nadigos iti bukodna a dara. Ginuyod ti lakay ni Ramon.
“Mapankan, señor... ibatinak lattan...” nakapsut ti timek ni Ramon.
Saan a simmungbat ni Gaspar Medalla. Ginuyodna latta ni Ramon. Agtigergeren dagiti imana. Saanna a mabalin nga ibati ti kasla imbilangnan nga anakna a badigardna. Ginuyodna latta ngem maysa a bala ti nangwatak iti barukong ni Ramon. Naipurikat dagiti nagparsiak a dara iti rupana. Timmangad. Nakitana ti maysa a lalaki a nakaiggem iti riple. Nakapaturong kenkuana ti paltog. Nagpusispos. Pinaltoganna ti tao iti ngato a kinagiddan ti pannakaarabas ti bala iti abagana.
“Vamos, Señor Medalla... Vamos!” inyikkis ti lalaki nga adda iti likud ti manibela ti Scion xB bayat ti panangpabanerberna iti lugan.
Nagtaray ni Gaspar Medalla iti lugan. Simrek ket kasla naibiat ti lugan a pimmanaw. Kinamat dagiti nagsasaruno a bala ti Scion xB ngem saan a nakaanay a nangdadael iti lugan agingga a nagpukaw.
Iti saan unay nga adayo, um-umkis ti sirena dagiti umas-asideg a pannakabagi ti linteg.
Naguyek ni Col. Davis. Naklaat ni Mrs Villa.
“Are you okay, Pat?” sinaludsod ti baket.
“Yeah,” insungbat ni Col. Davis. Kinitana ti agdardara a takiagna. Nakuldiasan laeng. Inuksobna ti T-shirt-na. Tallo a buli ti naikali iti bulletproff vest-na. Inikkatna ti bullet proof vest sa kinita ti barukongna. Nalabaga ti kudilna a sinalbag dagiti bala. Immanges iti nauneg. “I'm okay,” nayesngawna.
Immarakup ni Mrs. Villa a nabang-aran.
Nabati ni Sandra a nakakubukob iti poste. Agtigtigerger pay laeng iti butengna. Agsangsangit.
Kellaat, nalagip ni Mrs. Villa ni John. Nagsardengen ti pinnaltog. Nagtaray iti ‘yan ti nakapasagan ni John. Agtigtigerger daytoy a nagdalupakpak iti nakaidasayan ti anakna. Intal-o ni Mrs. Villa ti ulo ni John nga insadag iti saklotna. Nabara ti bagina. Impulsuanna ti anakna. Sibibiag.
“Is he all right?” matartaranta a nagsaludsod ti koronel.
“He is alive.” Napaisem ni Mrs. Villa a nangapros iti rupa ti anakna.
Nagareng-eng ni John. Nagmulagat. Ti rupa ti inana ti immuna a nakitana. Nalayus dagiti matana iti lua. “Mom…” kinuna sa sinagidna ti takiag daytoy.
“You're okay, anak... you're okay,” kasla inyindayon ti baket ti ulo ni John iti saklotna.
Nagin-inayad a bimmangon ni John. “Ni Gaspar Medalla?” sinaludsodna ken ni Col. Davis a nakatugaw iti sibayna.
“Diak ammo...” insungbat ni Col. Davis.
Nagkaribuso dagiti nakaad-adu a pannakabagi ti linteg a nangsawar iti uneg a nalawagen. Sumagmamano a katao ti naudatal. Sumagmamano ti agar-areng-eng a nasugatan.
“Sadino ti ‘yan ti kuarta? Sadino ti ‘yan ni Gaspar Medalla?” sinaludsod ni Agent Rojas.
Saan a simmungbat ni John. Nagwingiwing ti koronel.
“Fuck, where the hell is my money? Where is Gaspar Medalla?” imkisen ni Agent Rojas. Nagtanabutob a nangkugtar iti uray no ania ditan a makitana.
Inuksob ni John ti T-shirt-na. Binilangna dagiti bala a nailumlom iti bullet proof vest-na. Pito. Inuksobna ti bullet proof vest. Bimmalay ti dara kadagiti batog ti nagdissuan ti bala iti barukongna. Ginuyodna ti transceiver a nai-tape iti barukongna.
Agrasrasaw pay laeng ken ti la adda a makugkugtaranna ni Agent Rojas.
“Ania ti napasamak?” naalumamay ti timek ni Agent Donoteli a nagsaludsod. “Dakayo ken Colonel Davis ti nakapaltog kadagiti amin a biktima ditoy? It looks like a war zone.”
“I guess,” inling-i ni Col. Davis ti abagana. “Dakami laeng ti adda ditoy.” Timmangad a nangipalawlaw iti panagkitana. Ammona nga adda dagiti dua a sarhento itay kapades ti pinnaltog. Ngem masiguradona nga adda pay kakaduada. No asinoda man, awan ti pangngepna a mangammo.
“F_ _k, John. Shit! Look what happened. We lost the money. We didn't even get Gaspar Medalla. Kalpasan ti adu a preparasion, kastoy ti pagtungpalan ti operasion. Shit!” inyikkis manen ni Agent Rojas.
“Agent Rojas, could you watch your mouth please…” Kinusilapan ni John ni Agent Rojas. “My mom is here.”
Kinita ni Agent Rojas ni Mrs. Villa. Timmarabang daytoy.
“So, napanan ti kuarta agraman ni Gaspar Medalla,” nasimbeng ti saludsod ni Agent Donoteli.
“Nailugan ti kuarta iti amarilio a Scion xB. Kadua ni Gaspar Medalla ti driver a pimmanaw ditoy,” insungbat ti koronel. “Diak ammo no nagturonganda. Basta nagpukawda met lattan.”
“Awan ti nasabatmi iti Industrial Road,” kinuna ni Agent Donoteli. “Naserraan ti Las Vegas Boulevard ken dadduma pay a mabalin a pagruaran. Awan ti nakakita iti lugan.”
Nagkinnita da John ken ti koronel. Atapen ni John nga addada pay laeng iti uneg ti pasdek.
“All unit... all unit… search all rooms inside the building. Everything. Subject is presumed to be still in the building, over,” inradio ni Agent Rojas.
“10-4,” sungbat manipud iti radio.
Simmangpet dagiti paramedic. Inluganda iti stretcher dagiti naposasan a nasugatan a Mehikano. Immasideg ti maysa a paramedic ken ni Mrs. Villa. Nagsaludsod daytoy no kasapulanna ti medical help. Nagwingiwing ti baket.
“But she needs one,” kinuna ni Mrs. Villa a nangitudo ken ni Sandra a nakakubukob pay laeng.
Nadlaw ni John ti saan man laeng a yaasideg ti inana ken ni Sandra. “Ania ti napasamak, Mom?” sinaludsodna.
“Awan, awan ti napasamak,” kinuna ni Mrs Villa ket timmallikud daytoy idi ilabasda ni Sandra a naka-stretcher.
Kiniddaw ni John ti pannakisaritana ken ni Sandra. “Ladingitek a nairamramanka iti daytoy a pasamak,” kinunana. “Diak ammo no kasano a dumawatak iti pammakawan kenka.”
Saan a limmingay ni Sandra ngem mangrugin nga aganug-og.
“Daytoy ti biagko, Sandra. Nariribuk. Ta uray no nagikkatakon iti US Marine a nangtallikud iti gubat iti Iraq ken iti Afghanistan, sursurotennak latta ti riribuk. Saan a daytoy a biag ti sapsapulen ti maysa a babai. You deserve better.”
Nagpusipos ni Sandra a nangmatmat ken ni John, ti kakaisuna a lalaki a nangtallikud kenkuana. Ti lalaki nga inlunlunodna sipud pay idi high school-da.
“Sapay koma ta mapakawannak iti inaramidko kenka,” kinuna ni John.
Nakudrepen ti panagkita ni Sandra ken ni John gapu iti pannakalayus iti lua dagiti matana. Ngem nasin-aw a maanninawanna ti kinatao ni John. Ti pardasna itay a nangisangnga iti bagina iti inana kadagiti nagsasaruno a kanalbuong a nanggudas koma iti inana. Ngem isu ti sinerkan dagiti bala.
Nagluloken ti riknana ni Sadra itay naudatal ni John iti kongkreto. Dina kayat a kitaen ti lalaki a kinagurgurana a saan koma gayam a rumbeng, ket nagtalinaed lattan a nagkububukob ken agsangsangit. Anian a kinatan-okna a lalaki ni John. Nakasagana a mangisakripisio iti biagna iti pannakasalaknib ti pamiliana. “Siak ti rumbeng a dumawat iti pammakawan,” nakapuy ti timekna iti baet ti saning-ina. “Nagbiddutak iti panangipagarupko kenka. Sapay koma ta mapakawannak.”
Immisem ni John. “Awan ti nagbasolam kaniak. Agyamanak iti pannakaawatmo.”
“Sapay koma ta agtalnanto met laeng ti biagyo,” kinuna ni Sandra a nagpangres. Tinaliawna ni Mrs. Villa a nakatallikud, sa manen nagsangit. “Misis Villa, I'm really sorry... kadagiti naaramid ken naisawangko... So sorry.”
Saan a timmaliaw ni Mrs. Villa.
Apagisu a nagkiriring ti selpon ni John. Ni Sgt. Ramirez.
“John, ammomi no sadino ti lokasion ken pagturongan ni Gaspar Medalla. Danonennakami iti nagsulian ti Rainbow Blvd. ken Desert Inn Road. And hurry!”
(Maituloyto)
